Էրեբունու բիլիարդանոցում օրեր առաջ իր ընկերոջ` Գոռ Հակոբյանի կողմից պատանդ վերցված Մ. Թ-ի առաջին հարցը իրավապահներին եղել է սա` ինչու եք սպանել Գոռ Հակոբյանին, այլ ոչ թե վնասազերծել: Այս մասին Aravot.am-ին պատմել է Մ. Թ-ն:
«Ամենաշատը ինձ հուզող հարցը դա էր, որովհետև նա իմ սիրած տղամարդն է: Ճիշտ է` այդ պահին նա ուզում էր ինձ սպանել, որովհետև դանակը պարանոցիս` նայում էր դեմքիս ու ասում` համ ես գնամ, համ ինքը գնա, բայց միևնույնն է ես հարց էի տալիս` ինչու չվնասազերծեցին, այլ սպանեցին: Իրենք ասացին` ուրիշ տարբերակ չի եղել, իրենք էլ չեն ուզեցել, որ մահանա, ինքն այնքան հյուծված ու թույլ է եղել, որ մինչև հիվանդանոց չի դիմացել, կրակոցը քներակին է կպել, թե այլ տեղ, արյունահոսել է: Ես երկու կրակոց եմ լսել ու հարցրել եմ` ինչու է երկու կրակոց հնչել, քննիչն ինձ ասաց, որ մի կրակոցը դեպի ձեզ չի ուղղվել, չկարողացավ պարզաբանել` երկրորդ կրակոցը ուր է դիպել, ասաց` մարմնի վրա մի կրակոցի տեղ է, մյուս կրակոցը չի կպել»,- պատմել է Մ. Թ-ն:
Նրա խոսքով, մինչև վնասազերծելը ոստիկաններ են մոտ մեկ ժամ բանակցել Գոռ Հակոբյանի հետ, վերջինս ավելի էր զայրանում ու ագրեսիվանում. «Բայց հաստատ Գոռ Հակոբյանը պատրաստ էր կտրուկ քայլերի, որովհետև այդ ընթացքում ինձ խփում էր ու դանակը պարանոցիս էր դրել: Այդ մարդն ինձ անծանոթ էր այդ պահին, չգիտեմ` ինչ էր կատարվում հետը»:
