Բելառուսի նախագահ Ալեքսանդր Լուկաշենկոն խնդիր չի տեսնում ԵՄ-ի հետ Ուկրաինայի կողմից ասոցացման մասին համաձայնագրի ստորագրման հարցում: Այս մասին Բելառուսի առաջնորդը հայտարարել է երկուշաբթի Մինսկում Ուկաինայի վարչապետ Նիկոլայ Ազարովի հետ հանդիպմանը, փոխանցում է RIA Novosti-ն:
Ուկրաինան եվրոպական ինտեգրման քաղաքականություն է հռչակել և պատրաստվում է նոյեմբերին Վիլնյուսում՝ «Արևելյան գործընկերության» գագաթնաժողովի ժամանակ ստորագրել ԵՄ-ի հետ ասոցացման մասին համաձայնագիր, որի մի մասն է համարվում ազատ առևտրի գոտու մասին դրույթը: Միաժամանակ Ուկրաինային հրավիրում են Ռուսաստանի, Բելառուսի և Ղազախստանի Մաքսային միություն և արդեն նրան տրամադրել են դիտորդի կարգավիճակ, սակայն Կիևը հայտարարում է, որ պատաստ չէ Մաքսային միությանը լիարժեք անդամակցել:
Լուկաշենկոն նշել է, որ ԵՄ-ի հետ Ուկրաինայի ասոցացման և Մաքսային միության հետ համագործակցության խնդիրը չափազանց քաղաքականացված է: «Մենք ինքներս ենք մեզ քշել հայտնի չէ, թե ուր»,- նշել է Լուկաշենկոն:
Բելառուսի ղեկավարը կարծում է, որ հետագայում Մաքսային միության երկրները պետք է Ուկրաինայի հետ համագործակցության ուղիներ փնտրեն: «Եթե Մաքսային միությանը բավարարեն Ուկրաինային առաջարկները, ապա մենք կգնանք ընդառաջ»,- ասել է նա՝ շեշտելով, որ եթե անդամներից որևէ մեկի շահերը ոտնահարվեն, ապա իրենք ընդառաջ չեն գնա, կամ կգնան որոշ փոխզիջումների հիման վրա:
Նրա խոսքով՝ ինչպես էլ Ուկրաինան իրեն դրսևորի, իրենք, միևնույն է, ստիպված են հարաբերություններ փնտրել Ուկրաինայի հետ, քանի որ, նրա խոսքով, իրենք դատապարտված են դրան:
Ազարովն իր հերթին նշել է, որ Ուկրաինան պետք է բավականին բարդ ուղի անցնի: «Մենք ստանձնել ենք մեծ պարտավորություններ և կկատարենք դրանք մեզ համար, ոչ թե ուրիշ մեկի»,- ասել նա:
«Մենք մեկը մյուսին չենք հակադրում, ցանկանում ենք գտնել ներդաշնակ համադրություն այն հնարավորությունների, որոնք տրվում են ինչպես Արևմուտքում, այնպես էլ Արևելքում տնտեսության զարգացման համար»,- ասել է Ազարովը:
