Սպիտակ տունը պատրաստ է աջակցել բյուջետային աշխատակիցներին հետին ամսաթվով աշխատավարձ վճարելու հանրապետականների օրինագիծը: Խոսքն այն պետական ծառայողների մասին է, որոնք ստիպված են եղել չվճարվող արձակուրդի մեկնել կառավարության աշխատանքի դադարեցման պատճառով: Այս օրինագիծը չի լուծի բոլոր խդիրները, սակայն նախագահի վարչակազմը հույս ունի, որ այն կմոտեցնի փոխզիջման հասնելը, հաղորդում է «Ռոսիա 24»-ը:
Միևնույն ժամանակ, ամերիկյան բանկերը նախապատրաստվում են դեֆոլտի. մեծացնում են կանխիկ պաշարները այն դեպքերի համար, եթե քաղաքացիները ցանկանան վերցնել իրենց խնայողությունները: Երկրում պետական հաստատությունների մեծ մասը փակ է: Ռեստորանները և սրճարանները վնասներ են կրում այցելուների բացակայության պատճառով: Հոկտեմբերի 4-ին նախագահ Բարաք Օբաման անձամբ է շփվել Վաշինգտոնի անհանգստացած բնակիչների հետ:
«Կառավարությունն արդեն այսօր կարող է վերսկսել աշխատանքը: Մենք գիտենք, որ նույնիսկ Ներկայացուցիչների պալատում կան այնպիսի մարդիկ, որոնք կարող են աջակցել մեզ: Եթե խոսնակ Ջոն Բայները թույլ տա քվեարկություն անցկացնել, մենք կարող ենք կարգավորել այդ վիճակը»,- ասել է Օբաման:
Մինչ Օբաման խոսում էր փոքր և միջին բիզնեսի ներկայացուցիչների հետ` խրախուսելով նրանց, Կապիտոլիի մոտ հավաքվել էին աշխատանքը կորցրած ամերիկացիներ: Նրանք կոնգրեսականներից պահանջել են հրաժարվել իրենց աշխատավարձերից:
