Լայնածավալ պատերազմի հավանականությունը Հարավային Կովկասում շատ մեծ է: Եթե լուրջ լարվածություն առաջանա Լեռնային Ղարաբաղի գոտում, տեսականորեն հնարավոր է, որ ռազմական գործողություններ լինեն նաև Նախիջևանի ուղղությամբ: «Առաջին լրատվական»-ի հետ զրույցում նման կարծիք հայտնեց արտաքին քաղաքականության, պաշտպանության և անվտանգության հարցերի փորձագետ Գրիգորի Տրոֆիմչուկը՝ խոսելով Նախիջևանում Ադրբեջանի և Թուրքիայի ռազմական ակտիվության, սպառազինության կուտակումների և անցկացվող զորավարժությունների մասին:
Փորձագետի կարծիքով՝ Ադրբեջանը շատ լավ է հասկանում ոչ միայն Նախիջևանի նշանակությունը, այլև այդ շրջանի թույլ կողմերը, աշխարհագրական անբարենպաստ դիրքը, ուստի ադրբեջանական կողմն իր անվտանգության տեսանկյունից ճիշտ է վարվում՝ ուժեղացնելով Նախիջևանի պաշտպանությունը, քանի որ եթե Ադրբեջանը հարված հասցնի Լեռնային Ղարաբաղին, այդ դեպքում հարվածի տակ կարող է հայտնվել Նախիջևանը: Մյուս կողմից վտանգ կա, որ ադրբեջանական կողմը կարող է հարված հասցնել Հայաստանին հենց Նախիջևանից:
Այս հարցին իր հոդվածում անդրադարձել է նաև Eurasianet կայքի սյունակագիր Զաուր Շիրիևը՝ նկատելով, որ վերջին տարիներին Ադրբեջանը նկատելիորեն ավելացրել է սպառազինությունների քանակը Նախիջևանում: Վերլուծաբանի տեղեկություններով՝ ներկայումս Նախիջևանում կան 20 000 ադրբեջանցի զինվոր, 400 զրահամեքենա, հակաօդային պաշտպանության և հրթիռահրետանային համակարգեր:
«Նախիջևանը Հարավային Կովկասի այն կետերից մեկն է, որը կլինի համակ ուշադրության կենտրոնում, եթե ռազմական գործողություններ սկսվեն տարածաշրջանում: Թուրքիան և Իրանը գտնվում են Նախիջևանի հարևանությամբ, էլ չենք խոսում այն մասին, որ Նախիջևանը սահմանակցում է նաև Հայաստանին: Եթե իսկական պատերազմ սկսվի Ղարաբաղի գոտում, դա լինելու է մեծ պատերազմ, և բնականաբար այդ դեպքում հրթիռային և այլ տեսակի հարվածների տակ են հայտնվում ինչպես Հայաստանի, այնպես էլ Ադրբեջանի բոլոր խոշոր քաղաքները՝ ներառյալ մայրաքաղաքները: Հարվածներ կարող են լինել հնարավոր բոլոր կետերից: Եթե խոսենք Նախիջևանի մասին, ապա Ադրբեջանը շատ հաջող դիրք է գրավում այս շրջանում, հետևաբար Նախիջևանը ռազմավարական կարևոր նշանակություն կարող է ունենալ հնարավոր պատերազմի ժամանակ»,- մեկնաբանեց փորձագետ Գրիգորի Տրոֆիմչուկը:
Փորձագետը այս համատեքստում կարևոր է համարում Հավաքական անվտանգության պայմանագրի կազմակերպության (ՀԱՊԿ) դերը Հայաստանի անվտանգության ապահովման և սպառնալիքների չեզոքացման գործում՝ ասելով, որ Հայաստանի հանրությունը ճիշտ հարցադրումներ է անում՝ ՀԱՊԿ-ից պահանջելով ավելի ակտիվ գործել և արձագանքել նման սպառնալիքներին:
Գրիգորի Տրոֆիմչուկի կարծիքով՝ շատ մեծ է հավանականությունը, որ կարող է լայնածավալ պատերազմ բռնկվել Հայաստանի և Ադրբեջանի միջև, որը կվերածվի մեծ պատերազմի. «Մենք չենք տեսնում Ղարաբաղյան խնդրի լուծում, առավել ևս, որ հակամարտությունը սրվել է 2016թ. ապրիլից հետո: Մենք հասկանում ենք, որ իրերի ներկայիս դասավորությունը ավելի ձեռնտու է Հայաստանին, իսկ Ադրբեջանը դժգոհ է ստատուս քվոյից, հետևաբար իրավիճակը շարունակելու է վատթարանալ»:
