Փակ շուկայի համար պայքարը շարունակվում է, սակայն «Ազատագրենք հուշարձանն օլիգարխից» նախաձեռնության անդամներն այլ մարտավարություն են որդեգրել:
Այսօր Մաշտոցի պուրակում հրավիրված քննարկման ժամանակ նախաձեռնության, ինչպես նաև «Նախախորհրդարան»-ի անդամ Գարեգին Չուքասզյանն ասաց, որ Փակ շուկան ունի միջազգային արժեք, և վաղ թե ուշ աղմուկը պետք է բարձրանար նաև միջազգային մակարդակով:
«Հայաստանը ստորագրել է միջազգային կոնվենցիա, ըստ որի՝ հուշարձանների պահպանության հարցը ոչ միայն հայկական, այլև միջազգային օրենսդրության խնդիրն է: Միջազգային առաջին արձագանքը եղավ սեպտեմբերի վերջին, երբ Հայաստանում մեկնարկեց գիտաժողով: Մեր շարժումն այդ օրերին Մատենադարանի մոտ կազմակերեպեց պիկետ, ինչի արդյունքում նրանք հայտարարեցին, որ հուշարձանի օտարումը՝ խոսքը հենց Փակ շուկային է վերաբերում, վերանորոգումն ու վերականգնումը պետք է իրականացվեն մասնագիտական խնդիրների համակողմանի քննարկմամբ և դրա սահմաններում՝ բացառելով որևէ ապօրինություն կամ կամայականություն»,- ասաց նա:
Չուքասզյանն ընդգծեց, որ այսպիսով սկսվում է Փակ շուկայի հարցի միջազգայնացումը:
Իր հերթին նախաձեռնության անդամ Վարդան Հակոբյանն ասաց, որ իրենք Փակ շուկայի հարցով բոլոր տեղերից ստացել են պատասխաններ՝ բացի քաղաքապետարանից. «Դիմել ենք տարբեր մարմինների՝ ոստիկանությանը, դատախազությանը, մշակույթի նախարարությանը, կադաստրի կոմիտեին, քաղաքապետարանին և քաղաքաշինության նախարարությանը: Երեկ Կադաստրի պետական կոմիտեից ստացանք պատասխան, որ իրենց չի ներկայացվել փաստաթուղթ որևէ պետական գրանցում ստանալու մասին, ներկայացվելու դեպքում միայն կքննարկեն, իսկ դատախազության և ոստիկանության պատասխանն ամենազավեշտալին էր. նրանք ոչ մի հանցակազմ չտեսան՝ այն դեպքում, երբ քաղաքապետարանը սեփականատիրոջը երկու անգամ տուգանել է անօրինական գործողությունների համար»:
Բանախոսը հավելեց, որ եթե, այնուամենայնիվ, շուկան բացվի, կնշանակի, որ մի քանի պետական օղակներ դառնում են հանցակից. «Ցանկացած պարագայում՝ եթե դա պետք է աշխատի որպես սուպերմարկետ, պետք է ունենա ՊԵԿ թույլտվությունը, որն առանց կադաստրի նախագծի և սեփականության վկայականի չի կարող լինել, իսկ կադաստրն էլ չի կարող տալ, որովհետև ոչ մի նախագիծ չկա: Այսինքն՝ եթե, այնուամենայնիվ, սուպերմարկետը գործի, կնշանակի՝ բոլոր օղակները հանցավոր համաձայնության են եկել: Կա՛մ շուկայի նախկին տեսքը վերականգնվում է և ապացուցվում, որ մենք ունենք պետականություն, կա՛մ ոչ, և ապացուցվում է, որ մենք պետականություն չունենք. երրորդ տարբերակ չունենք»:
Բացի այդ՝ բանախոսները տեղեկացրին, որ բողոքի ակցիաները շարունակվելու են՝ դրանք տարբեր բնույթ կունենան, օրինակ՝ Սերգեյ Դանիելյանն իր ներկայացումներից մեկը նվիրելու է հենց Փակ շուկային. «Մենք թույլ չենք տա, որ հուշարձանը շահագործվի այս կերպ, ամեն կերպ խոչընդոտելու ենք, մենք նրանց հանգիստ կյանք չենք տալու»:
Մանրամասները դիտեք տեսանյութում:
