Եգիպտոսի իշխանությունները որոշում են կայացրել դադարեցնել զբոսաշրջության ոլորտում համագործակցությունն Իրանի հետ: Ինչպես հաղորդում է ITAR-TASS-ը՝ Եգիպտոսի զբոսաշրջության նախարար Հիշամ Զաազուն հայտարարել է, որ տվյալ քայլը կապված է ազգային անվտանգության հարցերի հետ:
«Իշխանությունները պաշտոնապես տեղյակ են պահել մեր գերատեսչությանը զբոսաշրջության ոլորտում Իրանի հետ համագործակցության դադարեցման մասին»,- նշել է նա:
Միևնույն ժամանակ նախարարն ասել է, որ առկա խնդիրները լուծելուց հետո ոչինչ չի խոչընդոտի կրկին վերադառնալ համագործակցության զարգացմանը տվյալ ոլորտում: Զաազուն դժվարացել է պատասխանել այն հարցին, թե դա երբ տեղի կունենա:
Հիշեցնենք, որ Եգիպտոսը զբոսաշրջության ոլորտի խթանման համար 2013 թ. մարտին որոշակի սահմանափակումներով իր դռներն էր բացել իրանցի զբոսաշրջիկների համար: Եգիպտոսի ԱԳՆ-ն իրանցիներին թույլ էր տվել այցելել Շարմ Էլ-Շեյխ, Հուրգադա, Լուքսոր և Ասուան, սակայն նրանց համար արգելված էր մուտքը մայրաքաղաք Կահիրե: Ապրիլի սկզբին Եգիպտոսը հայտարարեց Իրանից եկող զբոսաշրջային թռիչքների դադարեցման մասին մինչև հունիս: Սակայն երկրում տիրող իրավիճակի պատճառով ավիաչվերթներն այդպես էլ չվերականգնվեցին:
