Երևանի Կոմիտասի անվան պետական կոնսերվատորիայի ռեկտոր Շահեն Շահինյանը հերքում է մամուլում տեղ գտած հրապարակումները, որոնց համաձայն` ինքը ստիպել է աշխատակիցներին, որ անձամբ դիմումներ գրեն ու հրաժարվեն աշխատավարձի բարձրացումից կամ իրենց մեկ դրույքից՝ անցնելով 0,75 դրույքաչափի, քանի որ բարձրացված 10,000 դրամները բուհն իր հաշվին պետք է վճարի:
«Առաջին լրատվական»-ի հետ զրույցում Շահինյանը հայտնեց, որ հրապարակավ խոստանում է` հոկտեմբերի 5-ին Կոնսերվատորիայի ողջ աշխատակազմը կստանա աշխատավարձն ամբողջությամբ, ոչ մի դրամ պակաս: Բուհում` տարբեր ամբիոններում, ադմինիստրացիայում 400 հոգի է աշխատում, ովքեր ստանում են նվազագույն աշխատավարձ: Ռեկտորը վստահ է` անուններ պահանջելու դեպքում կասեն` վախենում են բացահայտ խոսել: «Դժվար թե այդ 400 հոգին էլ վախենան, որովհետև եթե նման բան ես անում, այն պիտի վերաբերի բոլոր 400-ին: Ասում էին` սպառնացել եմ, որ կհեռացնեմ աշխատանքից, եթե չստորագրեն: Եթե մեկը գա, ասի, որ ես իրեն տեսել եմ ընդհանրապես… Ես Հայաստանում չեմ եղել, ԱՊՀ ռեկտորների խորհուրդ էր, հանդիպման էի: Ի՞նչ անեմ, ի՞նչ փաստ բերեմ: Հոկտեմբերի 5-ին մեր ամբողջ կոլեկտիվը կստանա աշխատավարձ: Եթե մեկը հուլիսի 1-ից հետո 1 դրամով պակաս աշխատավարձ կստանա, այդ ժամանակ թող ինձ ասեն, չվախենան, ես այդքան վախենալու մարդ չեմ այս շենքում, մեր կոլեկտիվն էլ այդքան վախեցող չի»,- ասաց նա:
Շահինյանի խոսքով` աշխատավարձի նվազում կարող է լինել, երբ դասախոսի ծանրաբեռնվածությունը չի բավականացնում: Բուհում դասախոսությունների գրեթե 90 տոկոսը անհատական է. եթե մեկ ուսանող դուրս է գալիս բուհից, դա ազդում է 6-10 դասախոսների վրա: Առավելագույն արդարություն ապահովելու համար ամբիոնի վարիչին, դեկանին թույլ չի տրվում դասախոսների դասաբաշխումն անել, դրա համար եկել են մի օպտիմալ տարբերակի` ուսանողն ինքն է որոշում` որ դասախոսի մոտ է սովորելու: «Կարող է լինել բեռնվածության պակաս, բայց դա անգամ իրավական առումով կապված չէ հրապարակման հետ: Ադմինիստրացիայում աշխատող մարդիկ մինչ օրս աշխատում էին մեկ դրույքով` 30 ժամ (մեկ դրույքը ենթադրում է շաբաթական 36-40 ժամ): Ինքս միանգամից չի, որ հասկացա` ուժեղ ու թույլ տեղերը որտեղ են, 1000 հոգանոց կոլեկտիվ է, որոշեցինք, որ և դասախոսները, և ադմինիստրացիան, կստանան աշխատավարձ այն չափով, որքան ժամ ունեն իրականում»,- ասաց նա:
Ռեկտորը փաստեց` Կոնսերվատորիայում վերջին 20-30 տարիներին ամենացածր աշխատավարձն է եղել բոլոր բուհերի համեմատ: Բուհի վարձը տարեցտարի բարձրացել է, այս տարի մի փոքր ավելի շատ. եթե գործիքային կատարողը 6 տարեկանից է ուսում ստանում, կա մարդ, ում մոտ ձայնն ի հայտ է գալիս 18 տարեկանից, այդ ամբողջ աշխատանքը բուհը 4 տարում է կատարում, իսկ դա, ըստ ռեկտորի, մեծ ծախս է, դրա համար նրանք կվճարեն 800,000-ի սահմաններում: Շահինյանի խոսքով` դա դեռ 35 տոկոսով ցածր է այն գումարից, որ իրենք պիտի վճարեն: Այս տարի բուհում 47 պետպատվերի տեղերը կրկնապատկվեցին, Գյումրիի մասնաճյուղի հետ ստացան 91 տեղ:
«Մեզ մոտ միշտ վախ է եղել, որ տաղանդավոր ուսանողը կարող է ուսման վարձը չվճարելու պատճառով դուրս մնալ բուհից»,- ասաց ռեկտորը` նշելով, որ բուհն ամեն կերպ ընդառաջում է տաղանդավոր ուսանողներին:
Ուսման վարձավճարների ավելացման հետևանքով Կոնսերվատորիայի ուսանողների թիվը չի նվազել, պարզապես վերջին երեք տարիներին` 90-ականներին ծնունդների թվի, նաև Կոնսերվատորիայի կողմից շեմը բարձրացնելու հետ կապված մի փոքր նվազել է նրանց թիվը: Վերջին տարիներին ամեն տարի ընդունվում է 160-170 ուսանող: Ռեկտորը կարծում է` ավելի լավ կլիներ 1000 ուսանողի փոխարեն լինեին 500 ընտրյալ ուսանողներ, շենքային պայմանները թույլ էլ չեն տալիս 600-700 ուսանողից ավել ունենալ:
Շահինյանը կարծում է, որ մամուլում նման կարգի հրապարակման պատճառ կարող են լինել սեպտեմբերից միաժամանակ սկսված գործընթացները. կատարվում են կառուցվածքային փոփոխություններ: «Բաժիններ կան` մեկ-երկու հոգանոց, մեկուկես դրույքով, անիմաստ էր դրանք պահելը` իրենց բաժնի վարիչներով, ավելի լավ է` կենտրոնացնել մեկ բաժնում` իր բաժնի վարիչով: Պետք է տեսնես` մարդը, որ գալիս է աշխատանքի, ունի՞ աշխատանք, կա՞ դրա անհրաժեշտությունը: Ադմինիստրացիան ինձնից մի քիչ նեղացած է, ես միշտ ասում եմ` ինձ համար կարևորը մասնագիտության դասախոսներն են, ամեն կերպ ավելորդ հաստիքներ չեմ ցանկանա մնան, որ ֆինանսական հոսքն ուղղենք դասախոսներին»,- ասաց Շահինյանը: Նա տեղեկացրեց` մարդիկ կային, ովքեր երեք կես դրույքով էին գրանցված. մարդը մի գործ էր անում, բայց մեկուկես դրույքով, այդ նրբությունները վայրկենական չեն հասկացվում, բուհը նրանց պահել է մեկ դրույքով` պահպանելով աշխատավարձը: Ռեկտորի համոզմամբ` ադմինիստրատիվ աշխատողները չեն էլ կարող մեկուկես դրույք աշխատել: Նրանք համաձայնության են եկել` դրույքաչափը փոխվում է, սակայն աշխատավարձը պահպանվում:
