«Ադրբեջանի և Ղարաբաղի միջև նույնականացման նշան դնելը ժողովրդավարացման խնդիրների, քաղաքական համակարգերի կայացման հարցում, կարծում եմ հանցավորության աստիճանի միամտություն է: Քաղաքական համակարգերի զարգացման տեսակետից մենք պարզապես գտնվում ենք տարբեր իրականությունների մեջ: Այն հանգամանքը, որ Լեռնային Ղարաբաղի գործող նախագահն անցումային շրջանում երեք տարով ընտրվեց որպես Արցախի Հանրապետության նախագահ, Արցախի ժողովրդի ռազմաքաղաքական որոշումն է»,-այսօր լրագրողների հետ զրույցում նշեց ԱԺ Արտաքին հարաբերությունների հանձնաժողովի նախագահ Արմեն Աշոտյանը:
Ա. Աշոտյանն ասաց, որ Արցախում չեն գտնի ո՛չ ազատ խոսքի բանտարկյալներ, ո՛չ սահմանափակում, ո՛չ վտարանդի լրագրողներ, ոչ կոռումպացվածության սարսափելի ճահճացում.«Դուք երբևէ տեսե՞լ եք Ալիևին Բաքվի հրապարակում առանց թիկնապահների զբոսնելիս, Իսկ Բակո Սահակյանին բոլոր զբոսաշրջիկներն են տեսնում»:
