«Առաջին լրատվական»-ի զրուցակիցն է ԱԺ ՀՅԴ խմբակցության պատգամավոր Անդրանիկ Կարապետյանը:
– Մի քանի օր է՝ քննարկվում է Պետդումայի նախագահ Վյաչեսլավ Վոլոդինի առաջարկը՝ Հայաստանում պաշտոնական կարգավիճակ տալ ռուսերենին, որ Հայաստանի վարորդական իրավունքները ճանաչվեն ՌԴ տարածքում: Սա Ձեզ չի՞ մտահոգում, և առհասարակ՝ ինչպե՞ս եք գնահատում Պետդումայի այս որոշումը:
– Ճիշտն ասած, լավ չեմ նայում էդ հարցին, քանի որ մենք ԵԱՏՄ-ի շրջանակներում պայմանավորվածություններ ունենք, մասնավորապես այն, որ ազատ գոտի է ստեղծվում ապրանքների, ծառայությունների և այլն, և այլն: Այս պարագայում, եթե նախապայման է դրվում, իմ կարծիքով՝ այստեղ արդեն իրավաբանության խնդիր է դրվում, և կարող եմ ասել, որ ճիշտ չեմ համարում:
– Դատապարտո՞ւմ եք:
– Եկեք անունը չդնենք դատապարտել, ուղղակի կարծում եմ, որ այս հարցը վերանայելու կարիք ունի, այդքան բան: Պետք է կամ միջխորհրդարանական, կամ միջկառավարական հանձնաժողով ստեղծել և այս հարցին ավելի ճիշտ մոտենալ:
– Հնարավո՞ր է՝ Դուք էլ միանաք «Ելք» խմբակցության պատգամավոր Էդմոն Մարուքյանի այն առաջարկին, որ ընդհանրապես Հայաստանը Եվրասիական տնտեսական միությունից դուրս գալու գործընթաց պետք է սկսի։
– Ես չեմ կարծում, որ նպատակահարմար է ԵԱՏՄ կազմից Հայաստանի դուրս գալու հարցը դրվի: Ես համաձայն չեմ դրա հետ, պարզապես քաղաքականությունը հնարավորինի արվեստ է, և պետք է աշխատենք, որ մենք մեր շահերը կարողանանք առաջ տանել:
– Ձեր խմբակցությունը որևէ կերպ չի արձագանքել Վոլոդինի այս առաջարկին: Ինչո՞ւ:
– Ազգային ժողովը արձակուրդի մեջ է, այս հարցերը չենք քննարկել խմբակցությունում, և դրա համար չեմ կարող պատասխանել:
– Ինչո՞ւ, ըստ Ձեզ, Ռուսաստանը հիմա լեզվի հետ կապված նման խնդիր առաջ քաշեց:
– Ճիշտն ասած, ես չգիտեմ՝ դա Վոլոդինի անձնակա՞ն կարծիքն է եղել, պահի տակ հումո՞ր է արել. ես այդ հարցերին լիարժեք չեմ տիրապետում և չգիտեմ՝ այնտեղ ինչ խոսակցություն է եղել, ոնց է եղել, պաշտոնակա՞ն է նա հայտարարել, թե՞ ընդամենը միջանձնյա խոսակցության արդյունքում է դա տեղի ունեցել: Այդ ամենը քննարկման հարց է. ես միանգամից գնահատական տամ՝ դա էլ ճիշտ չէ:
– Առհասարակ ինչպե՞ս եք գնահատում մեր և Ռուսաստանի հարաբերությունները: Տեսակետ կա, որ Ռուսաստանը Հայաստանը դիտարկում է որպես գաղութ, ոչ թե որպես ինքնիշխան պետություն:
– Կարծում եմ, որ մեր հարաբերությունները Ռուսաստանի հետ պետք է ավելի խորացնենք թե՛ տնտեսական և թե՛ ռազմական ոլորտներում: Եվ այսպիսի փոքր միջադեպերը… սրանք վերջնական լուծումներ և տարբերակներ չեն: Ժամանակը ցույց կտա: Ամեն դեպքում վիրավորված մարդու կեցվածք ընդունելն էլ ճիշտ չէ: Մենք պարտավոր ենք փոխադարձ ավելի ամուր կապ, հարաբերություններ ստեղծել, քանի որ այս պահին մեզ համար ստրատեգիկ առումով կարծում եմ, որ ճիշտ է:
– Իսկ չե՞ք տեսնում, թե ինչպես է Ռուսաստանը շարունակում զենք վաճառել Բաքվին: Բոլորովին վերջերս նոր խմբաքանակ վաճառեց Բաքվին: Ձեզ դա չի՞ մտահոգում:
– Որպես քաղաքացի՝ ես ունեմ իմ կարծիքը, բայց նպատակահարմար չեմ համարում այս պահին արտահայտվել, բայց որպես քաղաքական գործիչ և պատգամավոր՝ կասեմ, որ այս խնդիրը լուրջ վերանայման կարիք ունի:
Լուսանկարը՝ ArmLur.am-ի
