Շինարարությունում այս պահի դրությամբ 8.5 տոկոս անկում է: Այս մասին այսօր կառավարության նիստի ժամանակ հայտարարեց վարչապետ Տիգրան Սարգսյանը: Նրա խոսքով` դա պայմանավորված է նրանով, որ էլիտար բնակարանների նկատմամբ պահանջարկը նվազել է:
Միաժամանակ, ըստ Տիգրան Սարգսյանի, էկոնոմ բնակարանների նկատմամբ պահանջարկը մեծ է, թեև առաջարկը շատ չէ: Այս ուղղությամբ քայլեր են կատարվում, և դրանցից մեկն էլ 40 մլն դրամից ավելի գումարով անշարժ գույք գնող օտարերկրացիներին կացության կարգավիճակ տրամադրելն է:
Ըստ Տիգրան Սարգսյանի` կառավարությունը փորձելու է 2014-ին հասանելի դարձնել հիփոթեքային վարկերը պետական ծառայողների համար, որպեսզի նրանք կարողանան բնակարան ձեռք բերել:
«Այսօր հիմնական խոչընդոտը կանխավճարն է, շատ հաճախ պետծառայողները չունեն այդ գումարը: Պատրաստ ենք տրամադրել երաշխիքներ այդ 30 տոկոսի չափով»,- ասաց Տ. Սարգսյանը:
Նրա խոսքով` կկազմվեն ցուցակներ, որպեսզի պարզ լինի, թե քաղաքացիական ծառայողներից ովքեր են ցանկանում ստանալ հիփոթեքային վարկ:
Բացի այդ` կառավարությունը դիմելու է Երևանի քաղաքապետարանին, որպեսզի միջոցներ ձեռնարկվեն ցածր գներով շինարարական տեխնոլոգիաներ օգտագործելու համար:
