Մեկ օրում Իտալիայի ափեր է հասել ավելի քան 700 փախստական: Այս մասին հայտնում է France-Presse գործակալությունը՝ հղում անելով երկրի առափնյա պահպանության ծառայությանը:
Երկու նավ մոտեցել է Լամպեդուզա կղզուն, որը համարվում է Իտալիայի ամենահարավային ծայրը: Երրորդ նավը Սիցիլիայի Սիրակուզա նավահանգստի մոտ նկատել է ավիապարեկը:
Փախստականներից շատերը սիրիացիներ են: Մասնավորապես, հաղորդվում է, որ առաջին նավում մոտ 400 սիրիացի է եղել, իսկ երկրորդում՝ ավելի քան 100 մարդ, որոնց քաղաքացիությունը չի պարզվել: Երրորդում եղել է շուրջ 200 մարդ, որից 70-ը՝ երեխաներ:
Եվրոպայում հայտնվել ցանկացող մեծ թվով անօրինական ներգաղթյալները անցնում են Լամպեդուզա կղզով: Ներգաղթյալների ընդունման տեղի կենտրոնը, որը կարող է տեղավորել ընդամենը 350 մարդու, մնում է գերբեռնված: Ներկայում այնտեղ 1200 մարդ է գտնվում: Այս տարի Իտալիա ժամանող փախստականների թիվը մի քանի անգամ գերազանցում է անցած տարվա ցուցանիշը: Ներգաղթյալների մեծ մասը հիմնականում Էրիթրեայից են, Սոմալիից ու Սիրիայից:
