Մարտի 1-ի գործը 10 մասի բաժանելու նպատակն էր ավելի արդյունավետ քննություն ապահովելը։ Այս մասին լրագրողներին ասաց ՀՀԿ-ական պատգամավոր, նախկին գլխավոր դատախազ Գևորգ Կոստանյանը:
«Մինչև իմ պաշտոնավարումն այդ գործերն ամբողջական մեկ քրգործի շրջանակում էին քննվում, իսկ դա, որպես կանոն, առաջացնում է քննության անարդյունավետություն»,-ասաց նա՝ նշելով, որ գործերի առանձնացումը քննիչին, իրավահաջորդների ներկայացուցիչներին, փաստաբաններին և իրավապաշտպաններին հնարավորություն է տալիս ավելի առակայական պատկերացնել, թե գործը քննության որ փուլում է, ինչ հետևանքներ կան և յուրաքանչյուր քննիչի որոշում, որը ոչ արդյունավետ են համարում, կարողանան սահմանված կարգով բողոքարկել։
Կոստանյանն ընդգծեց, որ իր պաշտոնավարման ընթացքում ինքն արել է ամեն բան՝ մարտի 1-ի գործով քննությունն արդյունավետ ապահովելու համար:
Կոստանյանի խոսքով՝ մարտի 1-ի գործը արհեստական չի ձգձգվում, այլ պատճառն այն է, որ շատ հանգամանքներ անհայտ են և բացահայտման կարիք ունեն:
«Այն հանգամանքը, որ այդ քրգործերը չեն կասեցվում, նշանակում է՝ այդ քրեական գործերով բազմաթիվ անելիքներ կան»,-ասաց նա՝ հավելելով, որ դա նշանակում է, որ քննիչը և դատախազն այդ քրեական գործերով քննչական գործողությունների անհրաժեշտություն են տեսնում։
