Գների և աշխատավարձի աճի տարբերությունը գնալով մեծանում է: Ամսեամիս գները սկսում են ավելի արագ բարձրանալ, աշխատավարձն` ավելի դանդաղ:
Խոսքը հատկապես պետական հատվածում աշխատողների մասին է: Քանի որ հունվար-օգոստոսին պետական հատվածում աշխատողների աշխատավարձի աճը 2.4 անգամ հետ է մնացել գնաճից: Այսպես, անցած տարվա նույն ժամանակի համեմատ գնաճը 5.3 տոկոս էր, աշխատավարձի աճը` 2.2 տոկոս: Պետական հատվածում միջին ամսական անվանական աշխատավարձն այս տարվա առաջին 8 ամիսներին մոտ 116 հազար դրամ է:
Մասնավոր հատվածում վիճակը համեմատաբար բարվոք է, քանի որ այստեղ աշխատավարձի աճը 0.8 տոկոսով առաջ է անցնում գնաճից: 5.3 տոկոս գնաճի դեպքում ոչ պետական հատվածում միջին ամսական անվանական աշխատավարձն ավելացել է 6.1 տոկոսով և հասել մոտ 179.8 հազար դրամի:
Չնայած մասնավոր հատվածի ցուցանիշին, ընդհանուր պատկերով միևնույն է իրականում աշխատավարձը չի բարձրացել: Քանի որ ընդհանուր առմամբ միջին ամսական անվանական աշխատավարձի աճը 3.7 տոկոս է, ինչը զգալիորեն հետ է մնում գնաճից: Ընդ որում, գնաճի և աշխատավարձի աճի տարբերությունն արդեն քանի ամսի է անընդհատ մեծանում է: Եվ սա նշանակում է, որ իրական աշխատավարձը գնալով ավելի արագ է իջնում, իսկ մարդիկ` ավելի արագ աղքատանում:
