ԱԺ արտահերթ նիստին այսօր Սևանա լճից օրենքով սահմանված 170 մլն խմ ջրի փոխարեն մինչև 270 մլն խմ ջրառ անելու մասին Կառավարության որոշումն առսջին ընթերցմամբ ընդունվեց 77 կողմ, 3 դեմ, 0 ձայներով։ Դեմ էին միայն «Ելք» դաշինքի ներկա երեք պատգամավորը։
Մինչ քվեարկությունը «Ելք» դաշինքի պատգամավոր Արտակ Զեյնալյանը նկատեց` 130 հազար շահառուի ոռոգման հարցը կարելի է լուծել այլ եղանակով. «Թող այս նախագիծը չներկայացվի, թե գյուղացիների համար է արվում, այս նախագիծը ներկայացված է օրենքի խախտմամբ։ Այս օրենքը ոռոգման մասին չէ: Մենք դեմ ենք քվեարկելու, և կոչ եմ անում գործընկերներիս աջակցել մեզ` ՍԴ դիմելու հարցում՝ կամ միանան մեզ, կամ օգնեն, որ հարցը կարողանանք ՍԴ-ում վիճարկել»։
Այնուհետև նա, դիմելով ՀՀԿ պատգամավոր, բնապահպնության նախկին նախարար Արամ Հարությունյանին ու հիշեցնելով Սևանի ափամերձ հատվածում նրա ունեցած առանձնատունը, ասաց. «Գոնե հայտարարեք, որ շահերի բախում ունեք ու մի քվեարկեք»։
Վերջում նա նկատեց. «Մենք Սևանին վերաբերվում ենք՝ կարծես դա լինի բաք, այնինչ սա ազգային հարստություն է և բարիք է»:
