«Օրինաց Երկիրը» լիովին պաշտպանում է գործող նախագահի քաղաքականությունը ԼՂ հարցում, որին աջակցում է նաև միջազգային հանրությունը, այն է՝ ղարաբաղյան հիմնախնդրի լուծում բացառապես խաղաղ ճանապարհով»,- լրագրողների հետ հանդիպման ժամանակ հայտարարեց ԱԺ ՕԵԿ խմբակցության պատգամավոր Հովհաննես Մարգարյանը:
Մարգարյանի կարծիքով, «փոխընդունելի փոխզիջումն ավելին արժե, քան անխոհեմ առճակատումը». «Փոխզիջում՝ նշանակում է երկու կողմից էլ ինչ-որ մի բան զիջել. ես դրան կողմնակից եմ, և մենք պաշտպանում ենք այն երեք սկզբունքները, որոնք այսօր քննարկվում են»:
ԱԺ «Ժառանգություն» խմբակցության քարտուղար Լարիսա Ալավերդյանը բացասական է գնահատում Հայաստանի բոլոր երեք նախագահների քաղաքականությունը Լեռնային Ղարաբաղի հարցում: Նրա գնահատմամբ՝ այսօր խոսվում է Մինսկի խմբի կողմից առաջարկված մադրիդյան սկզբունքների մասին, որտեղ ամենուր գրված են «օկուպացված տարածք» խոսքերը, և խոսվում է այդ տարածքներից դուրս գալու մասին. «Միջազգայնորեն նման բան չկա, ես ուզում եմ տեսնել, թե այդ ո՞վ է վերադարձնելու, ավելի շուտ՝ նվիրելու Ադրբեջանին իրեն չպատկանող հողերը: Այդ մարդը գործ է ունենալու ժողովրդի հետ»:
Ալավերդյանը ընդգծեց, որ կա Լեռնային Ղարաբաղ երկիրը, պետությունը և ցանկացած փաստաթուղթ, որը կստորագրվի այդ տարածքների մասին մեկ այլ մարդու կողմից, իրավաբանորեն առոչինչ է:
