«Առաջին լրատվական»-ի զրուցակիցն է նախկին ոստիկանապետ, ԱԺ ՀՀԿ խմբակցության պատգամավոր Ալիկ Սարգսյանը:
– Պարոն Սարգսյան, «Սասնա ծռերի» փաստաբաններն ահազանգում են, որ դատարանի նկուղում ոստիկանները դաժան ծեծի են ենթարկել Սասնա ծռերին: Ինչպե՞ս եք գնահատում:
– Ցավոք սրտի, լավատեղյակ չեմ Սասնա ծռերի այդ միջադեպին, որևէ բան ասել չեմ կարող, ունեցած տեղեկություններս շատ քիչ են, մակերեսային: Կարծում եմ՝ արդարադատության նախարարության կալանավայրերի վարչությունը տեղում կնայի՝ եթե իրոք մարմնական վնասվածքներ, կապտուկներ կան, այդ դեպքում համապատասխան եզրակացությամբ կուղարկվի. թող փորձաքննություն անեն, թող մասնագետները նայեն: Եվ եթե կտան փորձագիտական եզրակացություն, և այդ մարդկանց էլ կլսենք, որ իրոք ծեծի են ենթարկվել, ես չեմ կասկածում, որ ոստիկանությունը ծառայողական քննություն կիրականացնի, մեղավորներին կպատժի և ձեզ էլ ի գիտություն կտեղեկացնի: Այս պահին պետք է համարժեք գնահատական տրվի՝ իրոք այդպե՞ս է եղել, թե՞ ոչ: Չէ՞ որ ծառայողական քննությունն ինքնին այն նպատակն է հետապնդւոմ, որ իսկությունը պարզվի՝ ոստիկանը մեղք ունի՞, թե՞ չունի: Եթե կա մարմնական վնասվածք, դա արդեն փաստացի քննության կարիք ունի:
– Վստահ եմ՝ տեսել եք ծառայությունից խուսափած պաշտոնյաների որդիների ցանկը: Անակնկա՞լ էր Ձեզ համար:
– Կներեք, այդ ցանկը չեմ նայել, բայց ինչի՞ մասին է խոսքը, ես էլ նման բաներ գիտեմ, տեղեկություններ ունեմ, լսել եմ: Մի բան միայն կարող եմ ասել՝ հիմա հանրապետության նախագահի խիստ հսկողության տակ է այս հարցը: Եվ կարծում եմ՝ ձեր նշած պաշտոնյաները հիմա ոնց որ թե զրկվելու են այդ «հաճույքից»:
– Այսինքն՝ այս բացահայտումը հիմք կտա, որ նրանք, անկախ ցանկությունից, դիրքից, ծառայության անցնե՞ն:
– Անպայման պիտի ծառայեն, ամեն մեկի որդու հարցը քննարկման թեմա կդառնա: Ասում եմ՝ հստակ հանձնարարական կա հենց նրանց նկատմամբ շատ ուշադիր լինել:
– Հանձնարարականը այս երկու օրերի ընթացքո՞ւմ է իջեցվել:
– Ոչ, արդեն տևական ժամանակ է՝ այս թեման կա: Նույն ՊՆ ընկերների հետ շփվում եմ, հստակ ասել են՝ նախագահի հանձնարարականը կա, խիստ ուշադիր լինել:
– Այսինքն՝ առաջին հերթին պաշտոնյաների որդինե՞րը պետք է գնան ծառայության:
– Իհարկե, և ես կարծում եմ՝ այդ միջնորդությունն այլևս չի գործելու: Առաջին հերթին հենց իրենք իրենց որդիների օրինակով պետք է օրինակ ծառայեն, որ մյուսների հանդեպ էլ կարողանան:
– Երեկ Սերժ Սարգսյանը գնաց կառավարություն և Կարեն Կարապետյանին դարձյալ իր աջակցության մասին նշեց: Ինչո՞ւ: Այդ մասին անընդհատ շեշտելու իմաստը ո՞րն է:
– Իմիջիայլոց, կարգն է այդպես: Ամեն անգամ կառավարության ծրագիրը ներկայացնելուց առաջ նախագահը գնում է:
– Բայց առաջին նիստը վարեց Կարեն Կարապետյանը:
– Դե ոչինչ, ինքն էլ երկրորդ նիստին գնաց, ինքն իր խոսքը պետք է ասեր կառավարությանը, և պարզորոշ նշեց, թե ինչ ծրագրեր և սպասումներ կան կառավարությունից:
– Դուք հստակ ստացա՞ք հարցի պատասխանը, թե ով կլինի 2018-ին վարչապետ: Սերժ Սարգսյանն ասաց, որ տվեց այդ հարցի պատասխանն իր ելույթում:
– Դե եթե տվել է այդ հարցի պատասխանը, ինձնից ի՞նչ պատասխան եք ուզում:
– Իրականում այդ հարցի պատասխանը ելույթում չկար:
– Չէ, ես ընդհանրապես քննարկմանն էլ չեմ մասնակցել, և ինձ դա քիչ է հետաքրքրում, թե ով կլինի: Ես գիտեմ, որ ծրագիր են մարդիկ ներկայացրել, և որ ծրագիրը պետք է իրագործեն: Եկեք ավելի շատ խոսենք ծրագրի իրագործման մասին: Ով կիրագործի՝ փառք ու պատիվ իրեն:
