«Առաջին լրատվական»-ի զրուցակիցն է ազատամարտիկ, Ապարանի ջոկատի հրամանատար, «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, «Ժառանգություն» կուսակցության 11-րդ համագումարին Րաֆֆի Հովհաննիսյանն ընդդիմադիր ուժերին կոչ արեց միավորվել և թավշյա հեղափոխություն իրականացնել։ «Ազատամարտիկների դաշինքը» քննարկե՞լ է այս հարցը, պատրա՞ստ եք միանալ։
– Նախ՝ «Ազատամարտիկների դաշինքը» դեռ նման բան չի քննարկել, որ կարողանամ պատասխանել դաշինքի անունից, բայց մեր ընդհանուր մոտեցումներն այն է, որ մենք ժամանակից շուտ նման հարցեր չենք մեկնաբանում: Եվ եթե բոլոր ընդդիմադիր ուժերը կմիավորվեն, կուզեն, որ երկրում ինչ-որ բան փոխվի, նման նպատակներ, խնդիրներ կդնեն, միասնական ուժ կձևավորվի, որ կարող է իր առջև խնդիր դնի, մենք, իհարկե, կկանգնենք այդ շարժման կողքը, եթե նման հնարավորություն իրականանա: Բայց ումո՞վ պետք է անեն թավշյա հեղափոխություն: Այս ընտրություններով հասկացանք, որ այս ժողովուրդն այն 88-ի ժողովուրդը չէ, հավատ, ամեն բան սպանված է ժողովրդի մոտ: Ժողովուրդն այսօր իր կերպարով հարմարվող է դարձել: Հիմա անձամբ ես՝ որպես քաղաքացի, ով համոզված է, որ մեր երկրում արմատական փոփոխությունների կարիք կա, ես Հայաստանում այդ մթնոլորտը չեմ տեսնում: Բացի այդ, «Ազատամարտիկների դաշինքը» քաղաքական միավոր չէ, որ վեր կենա և պոպուլիզմով առաջնորդվի: Մենք հստակ զինվորականներ ենք, ովքեր ուզում են իրենց կյանքով, իրենց ընկերների կյանքով ձեռք բերված երկիրն արժանապատիվ կեցվածք ունենա, որն այսօր չունի: Եթե կլինեն քաղաքական միավորներ, որոնք կմիավորվեն, և մենք կհամոզվենք, որ հնարավոր է իրենց հետ երկրում բան փոխել, իհարկե, մենք բացարձակապես որևէ վայրկյան չենք ուշանա, կմասնակցենք, կօգնենք: Բայց այսօր ես՝ որպես նախկին զինվորական, որպես քաղաքացի, քաղաքացիների մոտ նման բան չեմ տեսնում: Ժողովուրդը հարմարվել է, և չես հավատում, որ սա այն հաղթած ժողովուրդն է, որ յոթ միլիոն թուրքից չի վախեցել: Եվ երբ իշխանության կողմից բարեփոխումների ծրագրեր են հնչում, կարծես՝ հավատան:
– Այս փուլում ընդդիմադիրների՝ մեկ բևեռ ձևավորվելու հնարավորություն չե՞ք տեսնում:
– Ցանկալի կլինի:
– Դուք ՕՐՕ դաշինքով մասնակցեցիք ընտրություններին: «Ժառանգության» համագումարին ելույթ ունեցավ նաև դաշինքի առաջնորդ Սեյրան Օհանյանը: Դուք նրա առաջնորդությամբ պատկերացնո՞ւմ եք նման ուժի ձևավորում, նման կոնսոլիդացիա:
– Ինչո՞ւ չեմ պատկերացնում: Կարող է լինել: Մենք ժամանակի առաքելություն ունենք թե՛ անհատներով, թե՛ քաղաքական միավորներով: Եթե եկել մտել ենք այդ ծանրության տակ և այդ ծանրությունը երկրի լինելիության խնդիր է իր առաջ դրել, պայքարը քանի դեռ չի հասել իր հաղթանակին, այդ պայքարը պետք է շարունակվի: Ուրիշ բան, որ այսօր ուրիշ տեղ է պայքարը, այսօր ընդդիմությունն ընդդիմության դեմ է պայքարում, և սա է մեր դժբախտությունը: Իշխանությունները կարողացել են պայքարը տեղափոխել ընդդիմության ներս: «Բաժանիր, որ տիրես» սկզբունքն է մեզ մոտ գործել, և այսօր ոչ թե իշխանությունն է ուժեղ, այլ ընդդիմությունն է թույլ: Այս տրոհված, բաժանված, բզկտված, իրար դեմ պայքարող ընդդիմությամբ, իհարկե, չես կարող ժողովրդի մոտ հավատ ներշնչես, որ ժողովուրդը կարողանա համախմբվել: Ուրիշ բան, եթե անձնական ամբիցիաները կուսակցական առաջնորդները մի կողմ դնեն և համախմբեն իրեն շուրջ, լուրջ և հստակ խնդիր դնեն իրենց առաջ, և ես վստահ եմ, որ ոչ միայն ազատամարտիկները, ոչ թե միայն «Ազատամարտիկների դաշինքը», այլ ամբողջ ժողովուրդը ոտքի կկանգնի: Արտագաղթը երկրում տիրող վատ վիճակի վկայությունն է: Եվ եթե հաղթած սերունդը, անկախություն երազած երկրի քաղաքացին արտագաղթում է, սա մտածելու տեղիք է տալիս: Նշանակում է՝ մեր երկրում ինչ-որ բան թարս է, այն չէ: Եվ սրա դեմ պայքարում պետք է ազգովի միավորվենք, իսկ միավորվելու համար պետք է քաղաքական ուժերի առաջնորդները, անհատները, քաղաքացիները, ազատամարտիկները, պետք է գիտակցենք, որ դրված է մեր երկրի ապագան, և թողնելով նախկինում ունեցած բոլոր տարաձայնությունները, ամբիցիաները, կուսակցական խնդիրները՝ հենց սրա շուրջ պիտի հավաքվենք: Եվ պետք է իշխանության առաջնորդների գլխավորությամբ վերանայել իրենց վերաբերմունքը մեր երկրին: Եվ իրականում բացի մեր երկրի արտաքին թշնամուց, կա ներսի անվստահություն, վաղվա օրվա նկատմամբ անվստահություն:
– Իսկ ընտրություններից հետո արդյո՞ք ՕՐՕ դաշինքի հետ քննարկում եղել է, հիմա ինչ-որ առաջնահերթություններ ունի՞ դաշինքը:
– Իհարկե, միշտ էլ հանդիպում ենք մեր ընկերներին՝ թե՛ նախկին քաղաքական առաջնորդներին, թե՛ ԱԺ ընտրություններին մասնակցած քաղաքական ուժերի առաջնորդների հետ: Մենք շփվում ենք, նույն երկրի խնդիրներով, ցավով ապրող քաղաքացիներ ենք: Իշխանությունը գիտի՝ ում հետ ինչպես վարվել, որ կարողանան տրոհել, բաժանել: Եվ դրանից վախենալով՝ դրա դեմ պայքար են տանում: Պատահական չէր ՕՐՕ-ի դեմ իրականացրած արշավը: Եվ քանի որ ՕՐՕ-ից վախենում էին, դրա համար էլ կազմակերպված՝ ՕՐՕ-ի դեմ էին արշավ իրականացնում: Եվ խոսքը գնում է Սերժ Սարգսյանի պաշտոնավարման ժամկետից հետո վարչապետ դառնալու դեպքում դրա դեմ է պայքար լինելու, այդ ժամանակ նոր կերևա, եթե մենք անելիք ունենք, կզգանք: Գուցե մեր երկրի վիճակն այնքան լավ է լինում, որ անհրաժեշտություն չի լինում պայքարի: Եվ հիմա ես անձամբ չեմ տեսնում տրոհված ընդդիմությամբ որևէ քաղաքական պայքար, թավշյա կամ այլ հեղափոխություն, այդ պայքարը չի կայանա, քանի դեռ ժողովրդի մոտ հավատ չկա ուժերի նկատմամբ:
Լուսանկարը՝ ArmLur.am-ի
