Հայաստանի կառավարությունը հաստատել է իր՝ 2017-22 թթ.-երի ծրագիրն ու այն ներկայացրել խորհրդարան, որն էլ կքննարկի և ամենայն հավանականությամբ կընդունի այն։
Թե ինչպես է քվեարկելու այս ծրագրին իշխող Հանրապետական կուսակցությունը՝ ակնհայտ է, մեծ գաղտնիք չէ նաև, որ կառավարության ծրագրին կողմ կքվեարկի նաև ՀՀԿ-ի կոալիցիոն գործընկեր Դաշնակցությունը, որի անդամները վերջին օրերին իրենց հարցազրույցներում գովերգում են կառավարությունն ու նրա ղեկավարին։
Ընդդիմադիր «Ելք» խմբակցության անդամ Գևորգ Գորգիսյանն ավելի վաղ մեզ հետ զրույցում չէր բացառել, որ իենք կառավարության ծրագրին կարող է և կողմ քվեարկեն։ Այսօր «Առաջին լրատվական»-ի հետ զրույցում Գորգիսյանն ասաց, որ քվեարկության վերաբերյալ իրենց խմբակցությունն առայժմ որոշում չունի. «Այսօր առավոտյան ենք ստացել ծրագիրը՝ 120 էջ է, առայժմ ուսումնասիրում ենք։ Դեռ չենք որոշել՝ ինչպես ենք քվեարկելու»,- փոխանցեց պատգամավորը։
Ազգային ժողովի փոխնախագահ, «Ծառուկյան» դաշինքի պատգամավոր Միքայել Մելքումյանը «Առաջին լրատվական»-ին փոխանցեց, որ ծրագրին արդեն հասցրել է ծանոթանալ, բայց առայժ որոշում չունեն։ Վաղը «Ծառուկյան» դաշինքի խմբակցությունը նիստ է գումարելու, և ծրագրի վերաբերյալ նախնական կարծիքներ կհնչեցվեն։ Այդուհանդերձ, պատգամավորը չհստակեցրեց, կո՞ղմ են քվեարկելու, թե՞ ոչ, ասաց, որ իրենք հավատարիմ են իրենց նախընտրական ծրագրի 15 կետերին, իսկ ներկայացված ծրագիրն էականորեն տարբերվում է այդ կետերից. «Այսօր բոլորին ասել ենք՝ ծանոթանան, մարդիկ դեռ ծանոթ չեն, վաղը նախնական կքննարկենք՝ հետո պարզ կլինի։ Շատ մանրամասներ հաղորդել չեմ կարող, խորհրդարանում ելույթներ եմ ունենալու։ Միայն կասեմ, որ մեր ծրագրից էապես տարբերվում է՝ եզրակացությունը թողնում եմ ձեզ»,- փոխանցեց մասնագիտությամբ տնտեսագետ պատգամավոր Մելքումյանը։
Հարցին, թե ստացե՞լ է այնպիսի տպավորությոն, որ Կարեն Կարապետյանի գլխավորած կառավարությունը ցանկություն ուներ գոնե իրականացել նախորդ ծրագիրը, Մելքումյանն արձագանքեց. «Գիտեք, ես տպավորություններով չեմ առաջնորդվում։ Արդեն նշեցի՝ մեր մոտեցումները տարբերվում են։ Իհարկե որոշակի աշխուժություն նկատում եմ մենեջմենթի մեջ։ Գուցե նախկինում գործընթացներն ավելի դանդաղ են ընթացել, հիմա մի փոքր արագաշարժություն կա, բայց ռեալ պայմանները, որի մեջ պետք է ներդրումներ լինեն՝ արմատական հիմքը փոփոխությունների չի ենթարկվել։ Ֆունդամենտը նույնն է, կարող է էֆեկտիվ մոտեցումներ առաջ քաշվեց, բայց այս հիմքի վրա այն կարող է չաշխատել։ Արմատական փոփոխություն առայժմ չեմ զգում։ Մենք, ամեն դեպքում, հավատարիմ ենք մնում մեր 15 կետերին։ Աղքատություն, արտագաղթ, ներդրումների անվստահություն՝ այդ խնդիրները լուծված չեն։ Մենք չենք ասում՝ այս նախարարը կամ ղեկավարը վատ են աշխատում, պարզապես մեր մոտեցումները տարբերվում են քաղաքականություն՝ նախ մշակելու, հետո իրականացնելու առումով»,- եզրափակեց Ազգային ժողովի փոխնախագահը։
