Ինչպես գրում է բրիտական The Guardian-ը, առաջիկա 20 տարիների ընթացքում սննդամթերքի գները երկու անգամ կաճեն, ինչը կհանգեցնի նոր սոցիալական հուզումների: Թերթն այս հրապարակումում հղում է արել Oxfam բարեգործական կազմակերպությանը:
Oxfam-ի հետազոտությունների համաձայն, առավելագույնը կտուժի աղքատ բնակչությունը, որը սննդամթերքի վրա ծախսում է իր եկամուտների մոտ 80%-ը: Աշխարհը մուտք է գործում սննդամթերքի ճգնաժամի փուլ, որը բավական երկարատև է լինելու և կարող է հանգեցնել սոցիալական նոր հուզումների: Այս խնդիրը կարելի է լուծել միայն վիրահատական միջամտության շնորհիվ՝ փոխելով սննդի բաշխման ողջ համակարգը:
Նշվում է, որ մինչև 2030 թ. հիմնական սննդամթերքի գները կաճեն 180%-ով: Գնաճի հիմնական պատճառը լինելու են կլիմայական փոփոխությունները: «Երկրագնդի ամեն յոթերորդ մարդը սովի է մատնված, չնայած բավական սնունդ կա երկրագնդի մարդկանց կերակրելու համար: Համակարգը պետք է վերանայվի»,- ասվում է Oxfam-ի ղեկավար Բարբարա Սթոքինգի հայտարարության մեջ:
Oxfam-ը «Մեծ քսանյակի» առաջնորդներին կոչ է անում ձեռնամուխ լինել այս համակարգի բարեփոխմանը, որպեսզի հնարավոր լինի զսպել սննդամթերքի գների աճը:
Այս զեկույցը հրապարակվել է անմիջապես այն բանից հետո, երբ Մեծ Բրիտանիայի իշխանությունները հայտարարել են, որ առաջիկա շաբաթների ընթացքում գները կսկսեն նորից աճել, ինչը ժողովրդական հուզումների նոր ալիք կարող է բարձրացնել զարգացող երկրներում:
