Կահիրեի շրջանային դատարանը հետաձգել է Եգիպտոսի նախկին փոխնախագահ Մուհամադ Ալ-Բարադեյի դեմ հայցի դատալսումը. այն նշանակվել է հոկտեմբերի 19-ին: Դատալսումը պետք է կայանար հինգշաբթի: Այս մասին հաղորդում է RIA Novosti-ն՝ վկայակոչելով տեղի ԶԼՄ-ներին:
ԱԷՄԳ-ի նախկին ղեկավար և Խաղաղության Նոբելյան մրցանակի դափնեկիր Ալ-Բարադեյը մեղադրվում է «երկրի վստահությունը չարաշահելու մեջ»: Հայցվորի կարծիքով՝ «փոխնախագահի պաշտոնից հրաժարվելու պատճառով Եգիպտոսն աշխարհին ներկայացավ անբարենպաստ լույսի ներքո, և տպավորություն ստեղծվեց, որ իշխանությունները չարաշահել են ուժը ցույցը ցրելիս»:
Քաղաքական գործչի դեմ ներկայացված է մեկ այլ մեղադրանք ևս: Սեպտեմբերի սկզբին Եգիպտոսի գլխավոր դատախազը քննչական մարմիններին կարգադրել է սկսել մեկ այլ բողոքի հետաքննություն, որի համաձայն՝ Ալ-Բարադեյը «համագործակցել է ԱՄՆ-ի հետ և գաղտնի դավադրության մեջ եղել «Մուսուլման եղբայրներ» շարժման հետ»:
Հիշեցնենք, որ փոխնախագահ Ալ-Բարադեյը հրաժարականի մասին հայտարարել է Կահիրեում ցույցերի ցրման և այս կապակցությամբ երկրում սկսված բախումների ֆոնին, որոնց ժամանակ հարյուրավոր մարդիկ զոհվեցին:
