Սիրիայի նախագահ Բաշար Ասադը ամերիկյան Fox News հեռուստաալիքին տված հարցազրույցում հայտարարել է, որ իր երկիրը Ռուսաստանին է փոխանցել տվյալներ «ահաբեկիչների» կողմից քիմիական զենքի կիրառման մասին:
«Կան տվյալներ, որ ահաբեկչական խմբերը զարին գազ են կիրառել, և մենք փոխանցել ենք այդ տվյալները Ռուսաստանին»,- հինգշաբթի հայտարարել է սիրիացի առաջնորդը: Նրա խոսքով՝ զարինը կարող էր ընդդիմությունն ինքնուրույն պատրաստել, կամ դա կարող էր գրոհայինների ձեռքում հայտնվել արտերկրից: Ասադը կրկին ընդգծել է, որ զարինի կիրառումը հանցագործություն է, որի հետ սիրիական կառավարությունը ոչ մի կապ չունի:
Ասադը հայտարարել է նաև, որ երկիրն իսկապես քիմիական զենք ունի, սակայն պատրաստ է ազատվել դրա պաշարներից: «Մենք պատրաստ ենք քիմիական զենքը փոխանցել ցանկացած երկրի, որը կհամարձակվի և կընդունի այն»,- ասել է Սիրիայի նախագահը:
Նա նշել է, որ Սիրիան կրկին պատրաստ է ՄԱԿ-ի տեսուչներին թողնել իր տարածք: Ասադի խոսքով՝ քիմիական զենքի փոխանցման գործընթացը միջազգային վերահսկողությանը կարժենա մոտ 1 մլրդ դոլար և կտևի առնվազն 1 տարի:
