Հայտնի է, որ Հայաստանի տարածքում գտնվող պատմության, եկեղեցու և մշակույթի բազմաթիվ հուշարձաններ բարձիթողի վիճակում են: Դրանց մեծ մասը անտարբերության են մատնված թե՛ պետական համապատասխան մարմինների, թե՛ Հայ Առաքելական եկեղեցու կողմից:
Խորովածի մնացորդներ եկեղեցիների պատերի տակ, սմբակավորների հետքեր սրբատեղիների ներսում, կենցաղային աղբ, վանդալիզմի դրսևորումներ, փարթամ բուսականություն գմբեթների վրա, կրծկալներ՝ հուշ-թաշկինակներով լեցուն ծառերին… Ահա միայն փոքր մասն այն ամենի, ինչի ականտեսն են դառնում «Ճանաչիր քո երկիրը» երիտասարդական նախաձեռնության անդամները Հայաստանի հնավայրեր այցելելիս:
Այս մասին այսօր «Ուրբաթ» ակումբում կայացած ասուլիսի ընթցքում հայտարարեց «Ճանաչիր քո երկիրը»-ի ղեկավար Ռուբեն Բաղդիշյանը: Նա նշեց, որ, քանդվելուց բացի, օրհասական է Հայաստանի հասարակության կողմից պատմական ժառանգության հանդեպ հոգատար վերաբերմունքի բացակայությանը խնդիրը՝ առանձնակի տագնապալի համարելով այդ հարցում երտասարդության կողմից դրսևորվող կատարյալ անտարբերությունը:
«Այս խնդրին մեր ուժերի ներածին չափով լուծում տալու համար նախաձեռնության կողմից ամեն կիրակի իրականցվում են հայրենաճանաչողական արշավներ:
«Ճանաչիր քո երկիրը»-ի երիտասարդների կոմից ամեն շաբաթ իրականցվող նախաձեռնություններից է «Մաքրե՛նք հնավայրերը ժամանակակիից աղբից» ակցիան»,- հայտնեց Բաղդիշյանը՝ ներկայացնելով լքյալ վիճակում գտնվող հնավայրերի մի շարք լուսանկարներ:
Երիտասարդական նախաձեռնության անդամ Սոֆյա Հովսեփյանն իր հերթին նշեց, որ անչափ կարևոր է լրատվամիջոցներով հնավայրերի խնդիրների մասին քաղաքացիական հասարակությանը ահազանգելը: «Տարածված յուրաքանչյուր մամլո հաղորդագրությունից հետո ստացվում են տասնյակ զանգեր աշխարհի տարբեր երկրներում բնակվող մտահոգ հայերից»,- հայտնեց Հովսեփյանը:
Նա հիշեցրեց, որ «Ճանաչիր քո երկիրը» երիտասարդական նախաձեռնությունը հիմնադրվել է այս տարվա ապրիլին մի խումբ հայրենանվեր երիտասարդների կողմից և կոչված է բարձրաձայնելու Հայաստանի մշակութային և հոգևոր ժառանգության պահպանման խնդիրները՝ հետամուտ լինելով դրանց լուծման ուղղությամբ ձեռնարկվող քայլերի լուսաբանմանը: Հովսեփյանը կարևորեց այն հանգամանքը, որ նախաձեռնությունը չի համագործակցում ո՛չ քաղաքական ուժերի, ո՛չ պետական մարմինների, ո՛չ էլ մասնավոր ձեռնարկությունների և հիմնադրամների հետ: Նախաձեռնության բոլոր ակցիաները իրականցվում են դրա մասնակիցների անձնական միջոցներով, ինչը հնարավորություն է տալիս հարցերին մոտենալ զուտ դրանց ազգային կարևորության տեսանկյունից:
Ասուլիսի վերջում ընթերցվեց նախաձեռնության կոչը համայն հայությանը՝ դարերից եկած ժառանգությունը պահպանելու և հաջորդ սերունդներին փոխանցելու հարցի կարևորությունը գիտակցելու վերաբերյալ:
