Եվրոպայում անվտանգության և համագործակցության կազմակերպության (ԵԱՀԿ) գլխավոր քարտուղար Լամբերտո Զանիերը այս շաբաթ Երևանում էր: Նախագահականում նրան ընդունել է ՀՀ նախագահ Սերժ Սարգսյանը: Կողմերը քննարկել են Հայաստան-ԵԱՀԿ համագործակցությունը շարունակելու հնարավորություններն ու հեռանկարները: ԵԱՀԿ գլխավոր քարտուղարը ափսոսանք է հայտնել ԵԱՀԿ Երևանի գրասենյակի փակման կապակցությամբ՝ հայտարարելով, որ դրանով ԵԱՀԿ-ի համագործակցությունը Հայաստանի հետ չի ավարտվում:
Ի՞նչ նշանակություն ունի ընդհանրապես ԵԱՀԿ-ն Հայաստանի անվտանգության տեսանկյունից, և կարո՞ղ է արդյոք Երևանում ԵԱՀԿ գրասենյակի գործունեության դադարեցումը բացասաբար անդրադառնալ մեր երկրի անվտանգության վրա: Պատասխանելով «Առաջին լրատվական»-ի հարցին՝ ԱՊՀ երկրների ինստիտուտի փոխտնօրեն, քաղաքագետ Վլադիմիր Ժարիխինը կարծիք հայտնեց, որ տվյալ զարգացումը առանձնակի չի ազդի Հայաստանի անվտանգության վրա, քանի որ ԵԱՀԿ-ն լուրջ դեր չի խաղում Հայաստանի անվտանգության ապահովման գործում:
«ԵԱՀԿ-ի հանդեպ ամենայն հարգանքով հանդերձ՝ այնուամենայնիվ, Հայաստանի անվտանգությունը ապահովում են առաջին հերթին հայկական բանակը և Հայաստանում տեղակայված ռուսական ռազմաբազան, որը գործում է ըստ հայ-ռուսական պայմանագրի: Եթե խոսքը անվտանգության կամ կոնկրետ Լեռնային Ղարաբաղի շուրջ հակամարտության մասին է, ապա ԵԱՀԿ-ն մեծ դեր չի խաղում: Բանակցությունները, կարգավորման գործընթացն իրականացվում են Մինսկի խմբի, ոչ թե ԵԱՀԿ-ի միջոցով, ուստի չեմ կարծում, թե Երևանում ԵԱՀԿ-ի ներկայացուցչության փակումը վճռականորեն կազդի Հայաստանի անվտանգության վրա»,- մեկնաբանեց քաղաքագետը:
ԵԱՀԿ Երևանի գրասենյակի փակման հետևանքով կարո՞ղ է ավելի մեծանալ Հայաստանի անվտանգության ռուսական բաղադրիչը կամ Ռուսաստանի հետ համագործակցությունը ռազմական և անվտանգության ոլորտում՝ հարցին Վլադիմիր Ժարիխինը այսպիսի պատասխան տվեց. «Սպասեք, նրանք դուրս են բերում Հայաստանից իրենց ներկայացուցչությունը, ոչ թե զինված ուժերը, այդպես չէ՞: Ռուսական բաղադրիչը, որը ռազմական բաղադրիչ է, և հայկական բանակն են անվտանգության ամրապնդման կամ բարելավման երաշխավորները: Չեմ կարծում, թե ԵԱՀԿ-ի գնալուց հետո որևէ բան կփոխվի»:
