2009 թ. հունիսի 1-ին Ատլանտյան օվկիանոսում Air France ընկերության Airbus A330 ինքնաթիռի, որը կատարում էր թիվ 447 չվերթը դեպի Ռիո դե Ժանեյրո, ավիավթարից երկու տարի հետո օվկիանոսի հատակից հանվել է զոհվածներից 127-ի դիակները: Այս մասին երեքշաբթի օրը հայտարարել է դժբախտության զոհ դարձածների հարազատների բրազիլական ընկերակցությունը:
Երկուշաբթի օրը ավիավթարների քննության ֆրանսիական բյուրոն (BEA) տեղեկացրել է հարազատներին, որ 3900 մետր խորությունից, որտեղ գտնվում է ինքնաթիռի իրանը, հաջողվել է բարձրացնել 75 դի: Այս մասին հաղորդում է France Presse գործակալությունը: Մայիսին ինքնաթիռի մնացորդները հայտնաբերելուց հետո որոնողական ծառայություններին հաջողվել է հանել ևս երկու դի և նրանց ինքնությունը որոշել ԴՆԹ-ի օգնությամբ: 2009 թ.՝ դժբախտության առաջին շաբաթների ընթացքում, բրազիլացի և ֆրանսիացի որոնողներին հաջողվել էր գտնել 50 դի:
BEA հայտարարության մեջ ասվում է, որ քննիչները տիրապետում են բոլոր այն նյութերին, որոնք թույլ են տալիս բացահայտել վթարի իրական պատճառները, և ներկա պահին միակ գործողությունը ուղևորների և ինքնաթիռի անձնակազմի բոլոր անդամների դիերի դուրս բերումն է: Սև արկղերի նախնական ուսումնասիրությամբ պարզվել է, որ վթարի մեղավորն անձնակազմն է:
2009 թ. հունիսին տեղի ունեցած ավիավթարի ժամանակ ինքնաթիռում եղած բոլոր 228 հոգին էլ զոհվել են: Մայիսի 16-ին ավիավթարների քննության ֆրանսիական բյուրոն (BEA) տեղեկացրել էր, որ օվկիանոսի հատակից հանվել են երկու սև արկղերը, որոնք երկու տարի գտնվել են 3.9 կմ խորության վրա:
