Ազգային ժողովում «Հեռուստատեսության եւ ռադիոյի մասին» ՀՀ օրենքում փոփոխություններ եւ լրացում կատարելու մասին նախագծի քննարկման ժամանակ այսօր՝ մայիսի 30-ին, միմյանց ելույթներում հնչեցրած տեսակետները քննադատեցին ՀՀԿ-ական պատգամավոր Արման Սաղաթելյանն ու «Ելք» խմբակցության ղեկավար Նիկոլ Փաշինյանը:
ԱԺ փոխնախագահ Էդուարդ Շարմազանովը կողմերին հորդորեց հանդուրժողականություն ցուցաբերել միմյանց նկատմամբ: Արտահերթ ելույթ ունենալով՝ նա նշեց, որ այս խնդրում հիմնական մեխն ինֆորմացիոն անվտանգությունն է: «Սահմանամերձ շրջաններին, որոնք սահմաններ ունեն Թուրքիայի եւ Ադրբեջանի հետ, հնարավորություն ենք տալիս ստանալ ճիշտ տեղեկատվություն հայկական ռադիոընկերություններից»:
«Մենք ընդունում ենք, որ այն իշխանությունը չենք, որն իդեալական է. Հայաստանում երբեք չի եղել ու չի լինի իդեալական իշխանություն։ Բայց մեր աշխատանքի գնահատականը տվել է ապրիլի 2-ի ընտրություններին մեր հանրության մեծամասնությունը»,- ասաց Շարմազանովը։
Ի պատասխան «Ելք» դաշինքի պատգամավոր Նիկոլ Փաշինյանի այն հայտարարությանը, թե այս իշխանությունների օրոք զինադադարի հաստատումից հետո Ադրբեջանին տարածքներ ենք զիջել, Շարմազանովն ասաց, որ Ադրբեջանի և Թուրքիայի հետ հարաբերություններում իրենք հետընթաց չեն արձանագրել: «Գերմանիայի նման երկիրը ճանաչել է Հայոց ցեղասպանությունը, Կիպրոսի, Սլովակիայի նման երկրները, նույնիսկ ժխտողականությունն են ընդունել, և առաջին անգամ բանակցային գործընթացում ԵԱՀԿ ՄԽ համանախագահներն արել են հասցեական՝ հակաադրբեջանական հայտարարություն։ Իսկ ինչ վերաբերում է ապրիլյան պատերազմին, ապա մեր՝ բոլորիս ջանքերով մենք կարողացել ենք ձախողել Ադրբեջանի ղեկավարության պլանները: Մեր ընդհանուր միջոցներով մենք կարողացել ենք կանգնեցնել եւ ձախողել Ադրբեջանի քաղաքական ղեկավարության նպատակները, Ադրբեջանն ունեցել է ֆիասկո: Պե՞տք է դասեր քաղենք, այո, պետք է դասեր քաղենք և պետք է աշխատենք միասին»,- նշեց Շարմազանովը:
Մանրամասները՝ տեսանյութում:
