Աֆղանստանում մեկնարկել է 2014 թվականի ապրիլի 5-ին տեղի ունենալիք նախագահական ընտրությունների թեկածուների պաշտոնական գրանցումը: Այս մասին հայտնում է ITAR-TASS-ը՝ հղում անելով Աֆղանստանի Անկախ ընտրական հանձնաժողովի ներկայացուցիչ Նուր Մուհամմադ Նուրին:
Օրենսդրության համաձայն՝ ընտրություններին մասնակցելու ցանկություն ունեցող յուրաքանչյուրը պետք է ներկայացնի իրեն աջակցելու պատրաստ 100 հազար ընտրողների քվեարկության քարտերի պատճենները: Բացի դրանից՝ բոլոր թեկնածուները պետք է 17.5 հազար դոլար գումար գրավադրեն, իսկ նրանց տարիքը չպետք է լինի 41-ից ցածր: Ընտրությունների անցկացման ծախսը գնահատվում է 120 մլն դոլար, որը կտրամադրեն ԱՄՆ-ն, ԵՄ-ն ու Թուրքիան:
Նախագահական ընտրությունները կդառնան երրորդն Աֆղանստանում՝ 2001-ին թալիբների ռեժիմի անկումից հետո: Գործող նախագահ Համիդ Կարզայը երկու անգամ հաղթանակ է տարել՝ 2004-ին և 2009-ին: Երկրի սահմանադրության համաձայն՝ նա չի կարող առաջադրվել երրորդ ժամկետում:
Աֆղանական ԶԼՄ-ների տվյալներով՝ որոշ քաղաքական գործիչներ անհանգստացած են, որ Կարզայը կարող է փորձել սահմանադրական փոփոխության ճանապարհով մնալ իշխանության ղեկին: