ԱԺ աշխատակազմի նորանշանակ ղեկավար Արա Սաղաթելյանն օրեր առաջ հայտնաբերել էր, որ տարիներ ի վեր ԱԺ նախագահները կուտակել են շուրջ 30 օգնական ու խորհրդական, և ամեն հաջորդ խոսնակը չի ուզել վատամարդ լինի և պետության հաշվին ԱԺ նախագահի պորտաբույծ տասնյակ օգնականներ, ռեֆերենտներ և խորհրդականներ աշխատավարձ են ստացել պետությունից։ Նախօրեին ԱԺ նորընտիր նախագահ Արա Բաբլոյանը աշխատանքից ազատել է ԱԺ նախագահի օգնականի և խորհրդականի շուրջ 30 աշխատակցի ու ռեֆերենտների: Մեզ հասած տեղեկություններով՝ կրճատումներ է սպասվում նաև ԱԺ կապի և հասարակայնության հետ բաժնում, որտեղից նախատեսվում է կրճատել 11 հոգու, այդ թվում՝ խորհրդատուին և երկու գլխավոր մասնագետի:
«ԱԺ-ն ավելի քան 754 աշխատող ունի՝ ներառյալ պատգամավորներն իրենց օգնականներով: Պատգամավորների օգնականները անմիջական ենթակա են իրենց ղեկավարներին՝ պատգամավորներին, ուստի պատգամավորն ինքն է որոշում՝ որտեղ և որ ժամին ինչ աշխատանք իրականացնի իր օգնականը: Առհասարակ ոչ հիմնավոր բացակայություններ ԱԺ աշխատակազմում վերջին տարիներին չեն եղել»,- «Առաջին լրատվական»-ի հետ զրույցում, անդրադառնալով ԱԺ աշխատակիցների բացակայությունների մասին հրապարակումներին, ասաց Ազգային ժողովի հասարակայնության հետ կապերի և լրատվության վարչության պետ Արսեն Բաբայանը:
Անդրադառնալով Ազգային ժողովի աշխատակազմում սպասվող կրճատումներին՝ Արսեն Բաբայանը նշեց, որ առաջնահերթ օպտիմալացում է տեղի ունենում ԱԺ նախագահի աշխատակազմում, կատարվում են հաստիքների վերանայման աշխատանքներ: «Մենք ավելի վաղ սկսած գործընթացը շարունակելու ենք»,- հավելեց Արսեն Բաբայանը։
Ինչ վերաբերում է ԱԺ աշխատանքներից անհարկի բացակայություններին, Արսեն Բաբայանի խոսքերով՝ նման բան բացառվում է, աշխատանքային կարգապահությունը վերահսկվում է տեխնիկական համապատասխան միջոցներով, գրանցում են բոլոր աշխատակիցների աշխատանքային կարգապահությունը:
Լուսանկարը՝ Panorama.am-ի
