Ուկրաինան կարող է դառնալ Ռուսաստանի «մարզ»՝ կարծում է ազգային անվտանգության հարցերով ԱՄՆ նախագահի նախկին խորհրդական Զբիգնև Բժեզինսկին: Այս մասին նա հայտարարել է Deutsche Welle-ին տված հարցազրույցում:
Բժեզինսկու կարծիքով՝ Մաքսային միությունն ունի ավելի շատ քաղաքական դրդապատճառներ, քան տնտեսական:
«Բացարձակապես ակնհայտ է, որ դրա էությունը կայանում է հետխորհրդային երկրներին մեկը մյուսի հետևից հպատակեցնելու մեջ: Ուկրաինան այդ կոնտեքստում ամենամեծ «ավարն է» և կարծում եմ, որ ռուսները լի են նրան հպատակեցնելու վճռականությամբ: Իրականում հարցը կայանում է նրանում՝ արդյոք ուկրաինացիները պատրա՞ստ են պաշտպանել իրենց անկախությունը: Այդ պատճառով իրենք՝ ուկրաինացիները պետք է որոշեն՝ արդյո՞ք կրկին մարզ են լինելու մեծ Ռուսաստանի կազմում»,- ասել է նա:
Բժեզինսկին չի բացառում, որ Ուկրաինան կարող է հետևել Հայաստանի օրինակին, որը Եվրամիության հետ ասոցացման մասին համաձայնագրի ստորագրման պայմանավորվածություններից հետո ամեն դեպքում թեքվեց դեպի Մաքսային միություն, որից հետո ԵՄ-ում հայտարարեցին, որ համաձայնագիր չի ստորագրվի:
«Ուկրաինան, իհարկե, շատ ավելի մեծ երկիր է: Որոշ իմաստով նա Ռուսաստանի հետ ավելի փոխկապակցված հարաբերություն ունի, քան Հայաստանը, որը աշխարհագրականորեն, այսպես ասած, կտրված է»,- ասել է նա:
Բժեզինսկու կարծիքով՝ Կրեմլը փորձում է վերակենդանացնել թոշնող ուսմունքը:
«Սակայն հեռավոր հեռանկարում ուկրաինա-եվրոպական ավելի մոտ հարաբերությունները ուղի կհարթեն ռուս-եվրոպական ավելի սերտ փոխհարաբերությունների համար, քանի որ հասկանալի է, որ Ուկրաինան և Ռուսաստանը փիլիսոփայորեն և մշակութորեն Եվրոպայի մի մասն են: Ուկրաինան սերտ համագործակցում է Ռուսաստանի հետո, քանի որ օգուտ ունի դրանից, սակայն անուղղակիորեն դրանից օգուտ ունի նաև Ռուսաստանը»,- ասել է նա:
Բժեզինսկու կարծիքով՝ դա Ռուսաստանի համար ավելի հեռանկարային ապագա է, քան այն տարբերակը, երբ Ռուսաստանը մեկուսացված է և փորձում է կաշառելու միջոցով հասնել իր նոր կայսրությանը Ուկրաինայի ինտեգրմանը՝ միևնույն ժամանակ սեղմված մնալով միավորված Եվրոպայի և Չինաստանի միջև, որը գնալով հզորանում է:
Բժեզինսկին համոզված է, որ Ուկրաինայի մերձեցումը Եվրոպայի հետ պայմաններ է ստեղծում, որոնք կաջակցեն նաև Ռուսաստանի մերձեցմանը Եվրոպային՝ եթե ոչ վաղը, ապա վաղը չէ մյուս օրը:
«Այդ պատճառով դա ամենաառաջինը ոչ միայն Ուկրաինայի, այլ նաև Ռուսաստանի և ընդհանուր առմամբ Եվրոպայի շահերից է բխում, որ Եվրոպային անդամակցելու Ուկրաինայի գործընթացը սաբոտաժի չենթարկվի, չընդհատվի և չվերածվի Ուկրաինան Ռուսաստանի մեծ կայսրությանը ենթարկելու փորձերի»,- ընդգծել է Բժեզինսկին:
Նա հավելել է, որ Ուկրաինան ինքը պետք է ընտրի իր ապագան:
