Առաջիկայում Կենտրոնական ընտրական հանձնաժողովը կնշանակի Արտաշատի քաղաքապետի ընտրությունների օրը, և հետո միայն մենք մեր թիմով կորոշենք թեկնածուի մասին, այսօր լրագրողների հետ ճեպազրույցում պատասխանելով Արտաշատի քաղաքապետի ընտրությունների մասնակցելու մասին հարցին` հայտարարեց «Ծառուկյան» դաշինքի անդամ Արգամ Աբրահամյանը։
Հիշեցնենք, նա ՀՀ նախկին վարչապետ Հովիկ Աբրահամյանի որդին է, Արտաշատի նախկին քաղաքապետը, որը օրերս հրաժարական էր տվել։
Հարցին, թե արդյոք «Ծառուկյան» դաշինքի թեկնածուն Արտաշատի փոխքաղաքապետ Գագիկ Պողոսյանն է, նա պատասխանեց. «Դեռ քննարկումներ են ընթանում։ Առաջիկայում կներկայացնենք»։
Լրագրողը հետաքրքրվեց, թե արդյոք ընդդիմադիր պատգամավոր է լինելու Աբրահամյանը, նորընտիր պատգամավորը պատասխանեց. ««Ծառուկյան» դաշինքը եթե իշխանություն չէ, ընդդիմություն է, իսկ ես այդ խմբակցության անդամ եմ։ Խմբակցությունը ինչ դիրքորոշում ունենա, դա էլ իմ դիրքորոշումը կլինի»։
