Տարբեր մասնագիտական հաշվարկներով Հայաստանում քաղաքական ընտրություն կատարողների թիվը տատանվում է 300 հազարից կես միլիոնի հատվածում: Սրանք մարդիկ են, որոնց ընտրության, քվեարկության վրա ընտրակաշառքը, վարչական ռեսուրսն ազդեցություն չունեն: Այս մի քանի հարյուր հազար ընտրողները քաղաքական տարբեր հայացքներ ունեն, անգամ` պրիմիտիվ և իռացիոնալ, բայց նրանց մտածողությունը, նրանց վարքագիծը քաղաքական է: Սա ազատ Հայաստանի միջուկն է, շանսը, որ մի օր դրսից այլ աչքով կնայեն մեր ընտրություններին` դրանք չդիտարկելով եվրասիական ամոթալի փաթեթի մեջ: Արդյո՞ք 300 հազար կամ հինգ հարյուր հազար թիվը մեծ է, որոշիչ: Այս հարցը չունի սպառիչ, վերջնական պատասխան:
Ամեն բան պետք է նայել հարաբերականության, ձևակերպված խնդրի, օրակարգի համատեքստում: Եթե այս թվին մոտենանք «կրիտիկական զանգվածի» լյումպենածին տեսության տեսանկյունից և դրանով պայմանավորենք «կայծակնային» իշխանափոխության անհրաժեշտությունը, ապա պարտվելու ենք և հիասթափվենք, որովհետև գործ ունենք փոքր թվի հետ: Իրար փոխող մեր ընդդիմադիրները հենց այս պրիմիտիվ մեթոդոլոգիայով են արդարացնում իրենց կրկնվող սխալներն ու անտաղանդությունը:
Եթե ինչ-որ մեկը մտածում է էլեկտորալ այդ կապիտալն օգտագործել` իշխանությունների հետ «բազարներ» անելու համար, ապա ակնհայտորեն ուշացել է, որովհետև Գագիկ Ծառուկյանին այս «համարում» այլընտրանք գտնելն իրատեսական չէ:
Իսկ եթե ավելի ռացիոնալ դատենք, ապա այդ մի քանի հարյուր հազար ընտրողներն այն հույսն են, այն ճանապարհը, որ մեզ հասցնելու են ազատ Հայաստան, որում ընտրությունն ոչ թե քրեաօլիգարխիկ միջոցառում է լինելու, այլ` քաղաքական մրցակցության, հասարակական կոնսենսուսի դրսևորում: Ընդդիմության խնդիրն այդ մի քանի հարյուր հազարանոց էլեկտորատը կապիտալացնելն է, նրան քաղաքական «բնավորություն», արժեքային կողմնորոշում հաղորդելը: Այդ առումով` այսօրվա ընտրությունները կորսված շանս են` անկախ կանխատեսելի արդյունքներից ու մանր-մունր սյուրպրիզներից: Քաղաքական առումով` այսօր ոչ ոք չի հաղթելու, որովհետև պարտված երկրում հաղթողներ չեն լինում:
Ընտրությունների` մի քանի ժամից հասանելի դառնալիք արդյունքները բացարձակապես հետաքրքիր չեն: Հուսադրող է միայն, որ նույնիսկ այսպիսի անորակ համակարգի, ամուլ իշխանության և անհեռանկար ընդդիմության պարագայում, մի քանի տասնյակ հազար մարդ այսօր մոտենալու է քվեատուփին` քաղաքական ընտրություն կատարելու նպատակով: Սա նշանակում է, որ Ազատ Հայաստանն մի օր ոչ թե տեսլական, այլ իրականություն է դառնալու:
Լուսանկարը՝ Photolure-ի
