Երեկ «Ելք» դաշինքը հրապարակեց տեսանյութ, ըստ որի՝ քաղաքապետի թեկնածու Տարոն Մարգարյանի շտաբը ընտրակաշառք և քվեարկած ընտրաթերթիկներ է բաժանում մարդկանց։
Լրագրողների հետ զրույցում «Ելք» դաշինքի քաղաքապետի թեկնածու Նիկոլ Փաշինյանը նշեց. «Մեզ հաջողվել է փաստել ընտրակաշառքի ամենախոշոր դեպքը, ոչ թե ամենախոշոր ընտրակաշառքն է բաժանվել, այլ ամենաշատ փաստական նյութն ունենք տվյալ իրավիճակի մաիսն»:
Նա շնորհակալություն հայտնեց «Հայկական ժամանակ» թերթի լրագրող Աննա Զախարյանին՝ նրա խիզախության և կատարած աշխատանքի համար: Կուրղինյան փողոցում՝ Տարոն Մարգարյանի նախընտրական շտաբում նրա նկարահանած տեսանյութում հնչում են անուն-ազգանուններ, մարդիկ ցուցակով կանչվում են, գումար են ստանում քվեաթերթիկի նման թերթիկներ են ստանում:
Փաշինյանի խոսքով՝ լրագրողի կողմից դեպքի արձանագրումից հետո շտապ հանվել է Տարոն Մարգարյանի շտաբի ցուցանակը: «Այդտեղ առանցքային գործող անձանցից է 2012-ին թիվ 7 ընտրատարածքում ԱԺ պատգամավորի թեկնածու առաջադրված Վարդան Վարդանյանը, որը Սամվել Ալեքսանյանի, այսպես ասած «աշխատողն» է»,- նշեց Փաշինյանը:
Նրա հավաստմամբ՝ ոստիկանությունը ժամանել է և առաջին իսկ պահից նրանց խնդիրն է եղել, որ բոլորն այդտեղից հեռանան, տեղափոխվեն բաժին:
«Ոստիկանության Մալաթիա-Սեբաստիայի բաժին գոյություն չունի, Սամվել Ալեքսանյանի անձնական ոստիկանների խումբ է, որը սնվում է պետական բյուջեից, այդ բաժինը պետք է ցրվի»,- ընդգծեց Փաշինյանը:
Մանրամասները՝ տեսանյութում: