Ավելի քան մեկ ամիս Վենեսուելայում շարունակվող ցույցերի ընթացքում զոհվել է 44 մարդ։ Այս մասին հայտնում է «Սոցիալական կոնֆլիկտի մոնիտորինգի վենեսուելական մարմին» իրավապաշտպան կազմակերպությունը՝ փոխանցում է RIA Novosti-ն։
Իրավապաշտպանների խոսքով՝ հաշվարկը կատարվել է ապրիլի 1-ից մայիսի 7-ը ներառյալ։ Ավելի վաղ իշխանությունները հայտնել էին ցույցերի ընթացքում 36 սպանվածի մասին։
Իր հերթին մեկ այլ իրավապաշտպան կազմակերպություն՝ «Վենեսուելական քրեական ֆորումը» հայտնում է այդ ընթացքում ակցիաներին մասնակցելու համար մոտ 2000 ձերբակալվածի մասին։ Այդ թվից կալանքի տակ է մնում ավելի քան 650 մարդ։
Ցույցերը Վենսուելայում սկսվել են ապրիլի 4-ից՝ ընդդիմադիր Ազգային ժողովի իշխանությունը լրջորեն սահմանափակելու Գերագույն դատարանի որոշումից հետո։ Որոշումն այնուհետև չեղարկվել է, սակայն ընդդիմության կողմնակիցները փողոց են դուրս եկել՝ դատարանի անդամների հրաժարականի և արտահերթ ընտրությունների անցկացման պահանջով։ Այժմ նրանք բողոքում են նաև նախագահ Մադուրոյի նախաձեռնությամբ հիմնադիր ժողովի գումարման դեմ՝ համարելով դա սահմանադրության փոփոխման փորձ։
