Գյումրիում ռուս զինծառայողի կողմից Ավետիսյանների ընտանիքի 7 անդամներին սպանած Վալերի Պերմյակովի՝ Ռուսաստանում պատիժը կրելու փաստը զայրացրել է Ավետիսյանների իրավահաջորդներին: Նրանք ոչ մի կերպ չեն ցանկանում, որպեսզի ոճրագործը պատիժը կրի ՌԴ-ում, այլ ուզում են, որ մնա Հայաստանում, որպեսզի իրենց համար տեսանելի լինի, որ նա մինչև վերջ պատասխան կտա իր գործած հանցանքի համար:
Այս օրերին, երբ արդեն ռուսական լրատվամիջոցներն են գրում, որ Պերմյակովը պատիժը կրելու է Ռուսաստանում, տեղեկություններ կան, որ Ավետիսյանների իրավահաջորդները պատրաստվում են դատական գործընթաց սկսել Պերմյակովի պատժի կրումը Ռուսաստանում կրելու որոշման դեմ։
Ավետիսյանների իրավահաջորդների ներկայացուցիչ, փաստաբան Երեմ Սարգսյանն «Առաջին լրատվական»-ի հետ զրույցում ասաց, որ իրավական առումով այդ գործընթացի դեմ պայքար սկսել, դատական հայց ներկայացնել հնարավոր չէ, իսկ իրավական դաշտից դուրս այլ եղանակներով պայքար տանել ևս հնարավոր է: «Հարազատները, բնականաբար, դեմ են, որպեսզի Պերմյակովը տեղափոխվի Ռուսաստան: Իրենք ցանկանում են, որ Պերմյակովը մնա Հայաստանում, և տեսանելի ու վերահսկելի լինի պատժի կրման ընթացքը: Հիմնական պահանջը հենց դա է: Պարզապես խնդիրն այն է, որ իրավական առումով դժվարություններ կան: Խնդիրը համակարգված չի»,- ասաց Երեմ Սարգսյանը՝ հավելելով, որ Պերմյակովը հայկական իշխանության մոտ չի էլ գտնվում, որպեսզի պահեն կամ թույլ չտան նրան տեղափոխել ՌԴ: «Եթե հարցը շատ չոր դնենք, ապա մեծ հաշվով հարցն այն է, թե Ռուսաստանի Դաշնությունը Պերմյակովին կթողնի՞ Հայաստանում, թե՞ կտանի: Այսպես է խնդիրը: Պերմյակովը հիմա էլ գտնվում է իրենց մոտ, իրենց տարածքում: Իրենք են որոշում: Իսկ թե ներկա բանակցությունները ինչ ցույց կտան՝ պարզ կդառնա առաջիկայում»:
Եթե արդեն ռուսական լրատվամիջոցներն են Պերմյակովի տեղափոխման մասին գրում, կարելի՞ է եզրակացնել, որ հարցն արդեն որոշված է և իրավական, և քաղաքական առումով՝ հարցրինք Երեմ Սարգսյանին.«Հարցն էլ հենց դա է, որ դժվար է պատկերացնել, թե Ռուսաստանի Դաշնությունը Պերմյակովին կտա հայկական իշխանություններին, որովհետև այս դեպքում արդեն իրենք իրենց մոտ՝ ռուս ժողովրդին պետք է բացատրեն, թե ինչու տվեցին Հայաստանին: Եվ չեն կարող ասել, թե ինչու: Դրա համար ենթադրելի է, որ այս հարցով լուծում կլինի, հայկական կողմը բանակցությունների ընթացքում կփորձի լուծումներ գտնել: Համենայնդեպս, հույս ունենք, որ պետք է նման բան անեն»,- ասաց Սարգսյանը:
Փաստաբանի խոսքով՝ այս օրերին շատ է զուգահեռ անցկացվում Պերմյակովի և Հրաչյա Հարությունյանի միջև, իբրև թե նրանց փոխանակում են և այլն, բայց, նրա խոսքով, ոչ իրավական, ոչ բարոյական առումով այս երկու դեպքերի միջև զուգահեռ անցկացնելն անընդունելի է: «Այլ հարց է, որ ռուսական կողմը փորձի ինչ-որ քայլ անել և հարցը այդ լույսի ներքո ներկայացնել՝ մեղմելու համար իրավիճակը, բայց իրավական առումով որևէ կերպ, ոչ մի տիպի համեմատական հնարավոր չէ տանել»,- եզրափակեց Երեմ Սարգսյանը:
