Մինչ այս պահը կենսաթոշակային կամավոր կուտակային համակարգին դեռ ոչ ոք չի միացել։ Այս մասին այսօր լրագրողների հետ հանդիպման ժամանակ ասաց ԱԺ աշխատանքի և սոցիալական հարցերի մշտական հանձնաժողովի նախագահ Հակոբ Հակոբյանը։ Հիշեցնենք, որ կենսաթոշակային կոտակային համակարգը, որ ներդրվում է (ներդրվելու է) Հայաստանում, ունի երկու բաղադրիչ՝ կամավոր կուտակային համակարգ և պարտադիր կուտակային համակարգ։
Կամավոր համակարգը ներդրվել է այս տարվա հունվարի 1-ից, իսկ պարտադիր համակարգը, 2010 թ. դեկտեմբերի 22-ին ԱԺ ընդունած օրենսդրական փաթեթի համաձայն, ներդրվելու է 2014 թ. հունվարի 1-ից։ Մինչ այդ՝ 2013 թ. հունվարի 1-ից, ուժի մեջ կմտնեն այս համակարգի ներդրման հետ կապված մի խումբ այլ օրենքներ։
«Դեռ ոչ ոք չի միացել կամավոր համակարգին, որովհետև մեզ մոտ դեռ խնդիր կա այդ մեխանիզմը ստեղծելու հարցում»,- ասաց Հ. Հակոբյանը։ Հարցին, թե եթե այդպես էլ ոչ ոք չմիանա կամավոր համակարգին մինչև այս տարվա վերջ, հնարավո՞ր է որ այս իշխանությունը փոխի վերաբերմունքը պարտադիր համակարգ մտցնելու առումով, Հ. Հակոբյանը պատասխանեց՝ «Ամեն ինչ էլ հնարավոր է»։
Նրա խոսքով, կամավոր համակարգը պարտադիրից մի քանի տարի շուտ մտցնելը նպատակ է հետապնդում բացահայտել համակարգի հնարավոր խոցելի տեղերը, ինչը կարող է նաև պարտադիր համակարգի վերաբերյալ օրենսդրությունում որոշ փոփոխությունների հիմք հանդիսանալ։
