Ինչպես տեղեկացրել էինք՝ սեպտեմբերի 5-ին 08.30-ի սահմաններում ոստիկանության Մաշտոցի բաժին հաղորդագրություն էր ստացվել, որ «ձախ ոտքի հետին հատվածի պատռված արյունահոսող վերք» ախտորոշմամբ բուժօգնության է տեղափոխվել 1990 թ. ծնված Վահագ Պետրոսյանը: Ինչպես ոստիկաններին ներկայացրել է Վ. Պետրոսյանի մայրը, որդին վնասվածք է ստացել տանը` աստիճաններից վայր ընկնելու հետևանքով:
Նշանակվել է դատաբժշկական փորձաքննություն, իսկ նույն օրը՝ ժամը 23.30-ին, հիվանդանոցից հաղորդում է ստացվել, որ Վ. Պետրոսյանը մահացել է:
«Առաջին լրատվական»-ի տեղեկություններով՝ վեճը եղել էր կենցաղային բնույթի, իսկ հորեղբայրը չարաշահած էր եղել ալկոհոլը:
«Վահագը եղբոր հետ խմած եկավ և սկսեց հայհոյել, Գրիշին խփեց, որ խփեց, Գրիշը ջղայնացավ, ինչ աստիճանի հասցրեց, երկուսն էլ խմած էին, իրար աննորմալ ձևով տփում էին, վերջը կատաղեց, դանակը վերցրեց ու խփեց»,- պատմում են հարազատները:
Ոստիկանության ձեռնարկված օպերատիվ-հետախուզական և քննչական միջոցառումների շնորհիվ պարզվել է, որ սեպտեմբերի 4-ին, ժամը 00.00-ի սահմաններում, Օհանով փողոցի թիվ 2 շենքի մոտ, վիճաբանության ժամանակ, 1974 թ. ծնված Գրիգոր Պ.-ն խոհանոցային դանակով հարվածել է Վ. Պետրոսյանի ձախ ոտքի հետին հատվածին և պատճառել մարմնական վնասվածք, ինչի հետևանքով վերջինս հիվանդանոցում մահացել է: Գրիգոր Պ.-ն բերման է ենթարկվել բաժին և տվել խոստովանական ցուցմունք:
Հանցագործության գործիք դանակը հորեղբայրը նետել է եղել փողոցի աղբարկղը:
Փաստի առթիվ ՀՀ քրեական օրենսգրքի 112 հոդվածի 2-րդ մասի 14-րդ կետի հատկանիշներով հարուցվել է քրեական գործ:
Կատարվում է քննություն:
