«Առաջ» շարժման հիմնադիր Էմանուել Մակրոնը և «Ազգային ճակատ» կուսակցության առաջնորդ Մարին Լե Պենը դուրս են գալիս Ֆրանսիայի նախագահական ընտրությունների երկրորդ փուլ՝ վկայում են երկրի ՆԳՆ տվյալները ձայների 97.47 տոկոսի հաշվարկի արդյունքներով։ Այս մասին փոխանցում է RIA Novosti-ն։
Մակրոնը ստացել է 23.86 տոկոս ձայն, Մարին Լե Պենը՝ 21.43 տոկոս ձայն։
Դեռևս չեն ստացվել տվյալներ երկու ընտրատեղամասերից։ Բացի այդ, ավելի ուշ կստացվի տեղեկություն արտերկրում գտնվող երկրի դեսպանատներում ու հյուպատոսություններում քվեարկության արդյունքների մասին։
«Հանրապետականներ» կուսակցության թեկնածու, Ֆրանսիայի նախկին վարչապետ Ֆրանսուա Ֆիյոնը դուրս է մնում ընտրապայքարից։ Նա ստացել է ընտրողների 19.94 տոկոսի աջակցությունը։ Ստացած ձայներով նրա արդյունքին մոտ է «Աննվաճ Ֆրանսիա» շարժման առաջնորդ Ժան-Լյուկ Մելանշոնը՝ 19.62 տոկոս ձայնով։
Մակրոնը կողմնակիցների առջև ելույթ ունենալուց հետո ուղևորվել է Փարիզի հայտնի բոհեմական La Rotonde ռեստորան՝ մտերիմների ու դաշնակիցների հետ հաղթանակը տոնելու՝ հայտնում է Le Parisien-ը։
