Մասնագետների հաշվարկների համաձայն` Տոկիոյում 2020 թ. օլիմպիական ամառային խաղերի անցկացնելուց տնտեսական օգուտը կկազմի 30 միլիարդ դոլար, հաղորդում է NHK հեռուստաալիքը:
Նշենք, որ Տոկիոն Օլիմպիադա 2020 թ. մայրաքաղաք է ընտրվել Միջազգային օլիմպիական կոմիտեի անդամների քվեարկության արդյունքում՝ 125-րդ նստաշրջանում, որն անցկացվել է Բուենոս Այրեսում: Բացի Ճապոնիայի մայրաքաղաքից, խաղերի անցկացման իրավունքին հավակնում էին Ստամբուլը և Մադրիդը:
Յոթ տարիների ընթացքում շինարարությունից, սպասարկման ոլորտի և այլ ճյուղերի զարգացումից Տոկիոյի տնտեսությունը կհամալրվի 30 միլիարդ դոլարով: Այս ընթացքում կստեղծվի 150 հազար աշխատատեղ: Մրցությունների ժամանակ հանդիսատեսների թիվը կկազմի 10 միլիոն:
1964 թ. օլիմպիական կենտրոնի վերակառուցման (մինչև 2019 թ.) համար կպահանջվի 1.3 միլիարդ դոլար: Արդյունքում մարզադաշտում ներկայիս 54 հազար մարդու փոխարեն կտեղավորվի մինչև 80 հազար մարդ: Բացի այդ, կկառուցվեն 11 սպորտային օբյեկտներ: Դրանց շինարարության համար կպահանջվի 3.9 միլիարդ դոլար: