Հայաստանում հանգստյան տներում հանգստացողների թիվը վերջին տարիներին նվազել է: Ինչպես «Առաջին լրատվական»-ին փոխանցեց Աղվերանի «Երեքնուկ» հանգստյան գոտու տնօրեն Սմբատ Երանոսյանը, դա կապված է երկրում լայն թափ առնող արտագաղթի հետ: Նրա հավաստմամբ՝ այս տարի «Երեքնուկ»-ում հանգստացողների թիվը նվազել է 15-20 տոկոսով, իսկ եթե ավելի հետ գնանք և դիտարկենք մի քանի տարիների կտրվածքով, ապա թիվը շուրջ 50 տոկոսով նվազել է: Նա նշեց, որ իրենց մոտ հանգստացողները Հայաստանի քաղաքացիներ են, դրսից հյուրեր գրեթե չեն ընդունում, դրա համար է այդ պատկերը:
Մեզ հետ զրույցում Ծաղկաձորի «Ալպինա» հանգստյան տնից ևս փոխանցեցին, որ այս տարի շուրջ 20 տոկոսով հանգստացողների թիվը պակասել է. «Նախ մարդկանց սոցիալական վիճակն է վատ, հետո էլ` ով գումար ունի, նախընտրում է այլ երկրում հանգստանալ»:
Այլ է վիճակն այն հանգստյան գոտիներում, որտեղ հանգստանում են զբոսաշրջիկներ: Վանաձորի «Կիրովական» հանգստյան տնից մեզ փոխանցեցին, որ իրենց մոտ հանգստացողների քանակը եղել է գրեթե նույնը, ինչ անցյալ տարի: Այստեղ հանգստանալու են գալիս հիմնականում Իսրայելից, ԱՄՆ-ից, եվրոպական երկրներից և Ռուսաստանից:
