Քաղաքագետ Երվանդ Բոզոյանը հունիսին Կազանում կայանալիք Սարգսյան-Ալիև-Մեդվեդև հանդիպումից կոնկրետ ակնկալիքներ չունի և անհավանական է համարում ինչ-որ առաջընթացի արձանագրումը:
«Փաստորեն, Ադրբեջանն է հանդես գալիս խնդիրն արագ լուծելու դիրքերից, և ամեն տարի տարբեր միջազգային ատյաններում հայկական կողմերի համար անբարենպաստ փաստաթղթեր են ընդունում: Այժմ արագ լուծման դիրքերից հանդես են գալիս նաև միջնորդները, ինչը բավականին մտահոգիչ իրավիճակ է ստեղծում»,- «Առաջին լրատվականի» հետ զրույցում, մեկնաբանելով Դովիլում Օբամայի, Սարկոզիի և Մեդվեդևի համատեղ հայտարարության մեջ նշված այն հանգամանքը, թե հունիսին կողմերը պետք է ավարտեն հիմնարար սկզբունքների շուրջ աշխատանքները, նկատեց Բոզոյանը:
Նրա խոսքերով, լուծման վերաբերյալ կողմերն ունեն տարբեր տեսակետներ, Ադրբեջանը փոխզիջման որևէ քայլի պատրաստ չէ, իսկ նրա ռազմատենչ հայտարարությունները չեն արժանանում արժանի գնահատականի միջնորդների կողմից:
Կազանի հանդիպման ժամանակ Մամեդյարովի ակնարկած երկու շրջանների վերադարձի հարցի քննարկման վերաբերյալ տեղեկություններին անդրադառնալով` քաղաքագետը նկատեց, որ այդ խոսակցություններն արդեն իսկ Հայաստանի համար անբարենպաստ են: Բոզոյանը նկատեց, որ այն դեպքում, երբ Ադրբեջանում բոլորը պատրաստվում են պատերազմի, որևէ զիջման մասին լսել չեն ուզում, Հայաստանում խոսում են զիջումների մասին, և գործող նախագահը, ցույց տալով, որ ինքը խաղաղասեր է, պարզապես դիվիդենտներ է շահում միջազգային հանրությունից:
Ըստ Բոզոյանի` միջազգային հանրության ճնշումները կիրառվում են միայն հայաստանյան կողմի վրա. «Եվ այդ երկու տարածքների մասին խոսակցությունները ցույց են տալիս, որ մենք հայտնվել ենք այն իրավիճակում, ինչը կար 1920թ.` բարոյալքված վիճակ հասարակության մեջ»: