Այսօր րագրողների հետ հանդիպմանը Մարդու իրավունքների պաշտպան Արման Թաթոյանը ներկայացրեց «2016թ-ի ընթացքում Հայաստանի Հանրապետությունում Մարդու իրավունքների պաշտպանի գործունեության, մարդու իրավունքների և ազատությունների պաշտպանության վիճակի մասին» տարեկան զեկույցը։
Նրա խոսքով՝ 2016թ.-ի ընթացքում ՀՀ Մարդու իրավունքների պաշտպանի աշխատակազմում ստացվել է 5113 դիմում-բողոք, որոնցից 1072-ը եղել է գրավոր։ Դիմում-բողոքներից 2590-ը Երևանից է ստացվել, Շիրակից՝ 247-ը, Լոռու մարզից՝ 224-ը,177-ը՝ Արմավիրից, 171-ը՝ Գեղարքունից,165-ը՝ Կոտայքից, 120-ը՝ Արարատից, 65-ը՝ Սյունիքից, 57-ը՝ Տավուշից, 42-ը՝ Արագածոտնից, 21-ը՝ Վայոց ձորի մարզից։
ՄԻՊ-ի հավաստմամբ՝ դիմում բողոքների մեծ մասը վերաբերել է ոստիկանության, քրեակատարողական հիմնարկների, Պաշտպանության նախարարության, դատական համակարգի գործունեությանը։
«Կալանքների բավարարման բավականին բարձր շեմ է գործում ՀՀ-ում, միջնորդությունների թվի 90-ից ավելի դեպքերում բավարարվում է, կալանքը բացառիկ դեպքերում, այն էլ որպես վերջին միջոց կիրառելու պրակտիկա չունենք»,- ընդգծեց Ա. Թաթոյանը՝ հավելելով, որ Քրեական օրենսգրքում անհրաժեշտ է հրատապ փոփոխություններ կատարել, պետք է այլընտրանքային խափանման միջոցներ կիրառվեն, բերման ենթարկեն կոնկրետ հիմնավորմամբ։ Մարդու իրավունքների պաշտպանը նաև ընդգծեց, որ դատախազության վերահսկողությունը՝ բերման ենթարկելու, ձերբակալելու և այլ գործողությունների մասով արդյունավետ չէ։
Ա. Թաթոյանը նշեց, որ որ մտահոգիչ մի շարք խախտումներ կան նաև ՔԿՀ-ներում, հոգեբուժարաններում։ Նա նաև տեղեկացրեց, որ առաջիկայում զեկույց է հրապարակվելու նաև 2016թ-ի հուլիսին ՊՊԾ գնդի գրավման շուրջ ստեղծված իրավիճակի վերաբերյալ։ Նրա խոսքով՝ զեկույցում քարտեզներով ներկայացված են այն վայրերը, որտեղ ոստիկանները բռնություն են կիրառել ԶԼՄ ներկայացուցիչների և ակտիվիստների նկատմամբ: ՄԻՊ-ի խոսքով՝ զեկույցի համար հիմք են ծառայել նաև մի շարք հրապարակումներ ու սոցցանցային գրառումներ:
«Առանձին գլուխներով անդրադարձ է կատարվում ոստիկանների կողմից հավաքի մասնակիցների իրավունքների խախտմանը, հատուկ միջոցների կիրառմանը՝ օրենքի խախտմամբ»,- նշեց ՄԻՊ-ը և հավելեց, որ առանձին անդրառնալու են 2016թ. հուլիսի 29-ին Սարի թաղում տեղի ուենցած երթին:
Մանրամասները՝ տեսանյութում:
