Նոր սառը պատերազմ թույլ չտալու համար անհրաժեշտ է Ռուսաստանին ներգրավել քաղաքական երկխոսության մեջ։ Ինչպես հայտնում է Interfax-ը, նման կածիք է արտահայտել ՆԱՏՕ-ի գլխավոր քարտուղար Յենս Սթոլթենբերգը ԱՄՆ նախագահ Դոնալդ Թրամփի հետ հանդիպման արդյունքներով մամլո ասուլիսի ժամանակ։
«Նոր սառը պատերազմից, սպառազինությունների նոր մրցավազքից և լարվածության ուժեղացումից խուսափելու համար պետք է շարունակել ներգրավել Ռուսաստանին քաղաքական երկխոսությունում»,-նշել է գլխավոր քարտուղարը՝ հավելելով, որ դաշինքը չի ցանկանում «նոր սառը պատերազմ, սպառազինությունների նոր մրցավազք»։
Բացի այդ, Սթոլթենբերգն ու Թրամփը քննարկել են ապրիլի 4-ին սիրիական Իդլիբ նահանգում քիմիական զենքի կիրառումը։ ՆԱՏՕ-ի գլխավոր քարտուղարը հայտարարել է, որ հարձակման մեղավորները պետք է պատասխանատվության ենթարկվեն։ «Քիմիական զենքի ցանկացած օգտագործում հանդիսանում է անընդունելի և չի կարող անպատասխան մնալ»,-ընդգծել է նա։
ԱՄՆ նախագահի հետ իր հանդիպումը ՆԱՏՕ-ի գլխավոր քարտուղարն անվանել է արդյունավետ։
