Հայաստանից միգրացիոն հոսքերն ընդհանուր առմամբ նվազել են, սակայն աճել է անվերադարձ մեկնողների թիվը: Այս մասին այսօր լրագրողների հետ հանդիպմանը նշեց «Վերադարձ և պաշտպանություն» սոցիալ-իրավական ՀԿ նախագահ Տաթևիկ Բեժանյանը: Նա ներկայացրեց վերջին երեք տարիներին արտագաղթի և ներգաղթի տվյալներն՝ ըստ իրենց հետազոտության, խոսեց տրանսֆերային հոսքերի նվազման պատճառների ու հետևանքների մասին:
Նրա խոսքով՝ միգրացիոն տեղաշարժի մեջ մեծ տոկոս է կազմում երկարաժամկետ աշխատանքային միգրացիայի համար մեկնողների և անվերադարձ մեկնողների թիվը:
«Տարեկան կտրվածքով՝ երկրից անվերադարձ հեռանում է 35 հազար մարդ, սակայն 2016 թվականին անվերադարձ մեկնողների թիվը դարձավ 37 հազար: Նրանց 47 տոկոսը կազմում են աշխատանքային միգրանտները, իսկ մշտականը՝ 53 տոկոս: Միտում է նկատվում նաև բարձր որակավորում ունեցող մասնագետների արտահոսքի։ Հուսադրող չեն տվյալները, քանի որ միտումը ցույց է տալիս, որ կարող է կրկնվել 90-ականների սկզբի իրականությունը, այսինքն՝ ուղեղների արտահոսք»,- նշեց Բեժանյանը:
Նրա հավաստմամբ՝ Հայաստանից աշխատանքային միգրանտների հիմնական հոսքը լինում է դեպի ՌԴ: Ըստ որում՝ վերջին տարիներին աշխատանքային միգրանտների հոսքը նվազել է, բայց դա պայմանավորված է ոչ թե Հայաստանի սոցիալ-տնտեսական վիճակի բարելավմամբ, այլ ՌԴ տնտեսությունն է թուլացել։ Բեժանյանի խոսքով՝ ընդհանուր միգրացիոն տարիքը 25-54 տարեկանն է, այսինքն՝ վերարտադրողական տարիքն է:
«Միգրացիոն հոսքերի նվազումը բերել է տրանսֆերտների նվազման, ինչը նույնպես պայմանավորված է արտաքին գործոններով՝ ՌԴ տնտեսությունը վերջին տարիներին վատթարացել է, ռուբլու կուրսն ընկել է: Նվազել են նաև առողջապահության և կրթության վրա ծախսվող գումարները»,- ընդգծեց Տաթևիկ Բեժանյանը՝ հավելելով, որ տրանսֆերտների 80 տոկոսը կենցաղային խնդիրների լուծման համար են ծախսվում:
Մանրամասները՝ տեսանյութում: