«Ֆուկուսիմա 1» ատոմակայանից 300 կմ հեռավորության վրա Խաղաղ օվկիանոսի հատակին հայտնաբերվել են ռադիոակտիվ վտանգավոր նյութեր: Այս մասին հաղորդում է Kyodo գործակալությունը՝ հղում կատարելով Ճապոնիայի կրթության և գիտության նախարարությանը: Մասնագետները չեն հերքել, որ վտանգված է նաև ծովամթերքը:
Հետազոտությունն իրականացվել է Ճապոնիայի հյուսիսարևելյան սահմանի երկայնքով՝ ընդգրկելով Միյագի և Տիբա պրեֆեկտուրաների հարակից տարածքները և ծովի հատակը: Մի քանի վայրերում հայտնաբերվել է ռադիոակտիվ նյութերի մեծ պարունակություն, որոնք նորման գերազանցում են մի քանի հարյուր անգամ:
Հիշեցնենք, որ Ճապոնիայում մարտի 11-ին տեղի ունեցած հզոր երկրաշարժի հետևանքով շարքից դուրս էր եկել «Ֆուկուսիմա 1» ատոմակայանի հովացման համակարգը, ինչը հանգեցրել էր վթարի և մեծ քանակությամբ ռադիոակտիվ նյութերի արտահոսքի:
