«Փաստինֆո»–ի փոխանցմամբ՝ Արտաքին գործերի փոխնախարար Շավարշ Քոչարյանն այսօր կառավարության նիստից հետո լրագրողների խնդրանքով մեկնաբանել է իր վերջին հարցազրույցներից մեկի ընթացքում արտահայտած մտքերը Հայայստանի՝ մաքսային միությանն անդամակցելու վերաբերյալ: Արձագանքելով լրագրողների այն դիտարկմանը, թե այդ հարցազրույցում ինքը տեսակետ էր հայտնել, որ մաքսային միություն մտնելով Հայաստանը կկորցնի իր ինքնիշխանությունը, Շավարշ Քոչարյանն ասել է. «Ես այդպիսի բան չեմ ասել: Խնդիրը վերաբերում է հետևյալին. Մաքսային միության անդամ դառնալը նշանակում է ինչ-որ աստիճանի ինքնուրյույն որոշումների սուվերենության պակաս: Դա կապված է մաքսային քաղաքականության հետ, դրույքաչափերի հետ»: ԱԳ նախարարի տեղակալը հավելել է, թե այդ դեպքում նշված հարցերով որոշում կայացնելու իրավունքը պատկանելու է արդեն վերազգային մարմնին:
Անդրադառնալով Ասոցացման համաձայնագրի նախաստորագրման գործընթացի վրա նոր իրավիճակի հնարավոր ազդեցությանը, Շավարշ Քոչարյանը հերթական անգամ վերահաստատել է, որ Հայաստանը պատրաստ է ստորագրման գնալուն: «Այդ պայմաանագիրը մեզ համար կարևոր է, որովհետև շատ մեծ աշխատանք է կատարվել այդ ուղղությամբ Եվրոպայի հետ, շատ լուրջ նվաճումներ կան այդ ուղղությամբ»,- ասել է Շավարշ Քոչարյանը:
Միաժամանակ նա չի թաքցրել, որ Մաքսային միությանն անդամակցելու պարագայում Խորը համապարփակ առևտրի գոտու պայմանագիրն անհամատեղելի է և այլևս չի կարող ստորագրվել, հավելելով, սակայն, որ մնացած բոլոր ծրագրերով համագործակցությունը Եվրոպայի հետ շարունակվելու է:
Փոխարտգործնախարարը նաև որոշ բացահայտումներ է արել, թե ինչպես է կայացվել Մաքսային միությանն անդամակցելու որոշումը:
«Այս ընթացքում եղել են բանակցություններ: Դա վերաբերում է և ընդհանուր սահմանի բացակայությանը, թե ինչպես կարելի է դա հաղթահարել և մի շարք այլ խնդիրների: Բայց այդ համակողմանի բանակցությունների արդյունքում վերջ ի վերջո դու կշռադատում ես, ծանրութեթև ես անում և ընդհանուր առմամբ դա մեզ համար ձեռնտու է»-ասել է փոխնախարարը:
Ամբողջությամբ՝ «Փաստինֆո»–ում
