«ԼՂՀ իշխանությունները միշտ ողջունել են ցանկացած մարդասիրական հայտարարություն, որն արվել է ԼՂ հարցի կարգավորման վերաբերյալ»,- «Առաջին լրատվականի» հետ զրույցում կարծիք հայտնեց ԼՂՀ ԱԺ փոխխոսնակ, «Ազատ հայրենիք» կուսակցության ներկայացուցիչ Արթուր Թովմասյանը՝ անդրադառնալով Դովիլում ԵԱՀԿ ՄԽ համանախագահող երկրների նախագահների համատեղ հայտարարությանը ԼՂ հարցի վերաբերյալ:
Թովմասյանը նկատեց, որ բանակցությունները տարվում են առանց ԼՂՀ իշխանությունների մասնակցության, և անգամ այդ պարագայում իրենք բազմիցս ողջունել են կառուցողական հայտարարությունները: Սակայն, ըստ Թովմասյանի, ԵԱՀԿ ՄԽ-ն ավելի խիստ պետք է լինի իր հայտարարություններում և պետք է ավելի կոշտ լինի Ադրբեջանի ռազմատենչ հայտարարությունների և դիպուկահարներին շփման գծից հետ քաշելու շուրջ անհանդուրժող կեցվածքի հանդեպ:
ԼՂՀ ԱԺ փոխխոսնակի կարծիքով՝ այս պայմաններում, երբ ամեն օր հազարից ավելի կրակոցներ են լինում շփման գծում, ավելի բարդ է որևէ համաձայնության գալը. «Իհարկե, թշնամու կողմից եղած ամեն մի կրակոցին հետևում է մեր պատասխան քայլը, բայց, այդուամենայնիվ, ԵԱՀԿ Մինսկի խումբն ավելի մեծ աշխատանք պետք է տանի զինադադարի պայմանները չխախտելու ուղղությամբ»:
Ինչ վերաբերում է Կազանում հունիսին կայանալիք Հայաստան-Ռուսաստան-Ադրբեջան եռակողմ հանդիպմանը, Թովմասյանը նկատեց, որ ոչ միայն Կազանում, այլ ցանկացած տեղ հնչած միայն մարդասիրական բնույթի հայտարարությունները կընդունվեն ԼՂ իշխանությունների և ժողովրդի կողմից. «Համոզված ենք, որ ցանկացած հիմնարար փաստաթուղթ, որի տակ չի լինի ԼՂ իշխանությունների ստորագրությունը՝ որևէ իրավական ուժ չի կարող ունենալ և կընկալվի սոսկ որպես թուղթ»: