Ազգային ժողովի հերթական ընտրությունների քվեարկությունը ընտրատեղամասերում մեկնարկել է ժամը 8-ից: Երևանի Ավան համայնքի 1/12 ընտրատեղամասում առավոտից նկատվում են կուտակումներ:
Հանձնաժողովի նախագահ Հասմիկ Բաբայանը մարդկանց աննախադեպ մասնակցության պատճառով չկարողացավ նշել, թե ժամը 9.30-ի դրությամբ քանի ընտրող է մասնակցել քվեարկությանը: «Կուտակումների պատճառը նաև քվեարկության կարգի փոփոխությունն է: Մարդիկ չգիտեն ծրարը որտեղ պետք է գցել: Մենք փորձում ենք ուղղորդել իրենց»,-հավելեց նա:
«Իրավունքի Եվրոպա» դիտորդական կազմակերպության ներկայացուցիչ Լիլիթ Մելիքյանի խոսքով` ընտրատեղամասը բացվել է ուղիղ ժամը 8-ին: «Ընտրությունների ընթացքը գնահատում եմ բավարար: Միակ խնդիրն այն է, որ մարդիկ լավ տեղեկացված չեն քվեարկության կարգից, և մենք օգնում ենք մարդկանց, որպեսզի նրանց ձայնը տեղ հասնի»,-ասաց նա:
Ավան համայնքի 1/12 ընտրատեղամասում գրանցված են 1879 ընտրող:
Քվեարկությունը կավարտվի երեկոյան ժամը 20:00-ին, ինչից հետո կսկսվի ձայների հաշվարկը: ՀՀ ոստիկանության հրապարակած վերջին տվյալներով՝ ընտրելու իրավունք ունեցող քաղաքացիների ընդհանուր թիվն է 2 միլիոն 564 հազար 195, հաշվառում չունեցող ընտրողների թիվը` 915: Ստացիոնար բուժում իրականացնող բժշկական հաստատությունում գտնվող ընտրողների թիվն, ըստ տվյալների, 2001 է:
Լուսանկարը՝ PanARMENIAN Photo-ի
