«Իրազեկ քաղաքացիների միավորում» ՀԿ-ն արձանագրել է, որ 114 դպրոցների և մանկապարտեզների տնօրեններ վարչական ռեսուրսի չարաշահում են թույլ տվել և հրապարակել է այդ մասին փաստող ձայնագրությունները:
Այսօր լրագրողների հետ զրույցում ՀՀ կառավարության աշխատակազմի ղեկավար-նախարար Դավիթ Հարությունյանը նշեց, որ ՀՀԿ-ի գրանցումը չեղյալ ճանաչելու հիմքեր բացարձակապես չկան:
Նա նշեց, որ դեռևս չի կարող ընդհանուր գնահատական տալ, քանի որ մանրամասն ծանոթ չէ եղելությանը, դեռևս միայն մի քանի ձայնագրություն է լսել: Դավիթ Հարությունյանի խոսքով՝ վարչական ռեսուրսների չարաշահումը կամ սխալ օգտագործումը անթույլատրելի է:
«Օրենսդրությամբ դա, իհարկե, պետական ծառայողներին արգելված է, սակայն էթիկայի կանոնները դա անել թույլ չեն տալիս նաեւ ոչ պետական ծառայողներին: Տվյալ դեպքում խոսքը ուսումնական հաստատությունների տնօրենների մասին է, սակայն ես չեմ կարող ընդհանուր գնահատել, քանի որ պետք է մանրամասն ուսումնասիրեմ: Ավելի վտանգավորն այն է, որ որոշակի լայնածավալ խախտումների պատրանք է ստեղծվում, երբ իրականում համանման դեպքերում պետք է ամեն ինչ մանրակրկիտ ուսումնասիրել: Երեկ հասցրել եմ մի քանի ձայնագրություն լսել՝ դեպքերից մեկում իսկապես խնդիր կա, իսկ մյուսներում ես ընդհանրապես ոչ մի խնդիր չտեսա: Սակայն եթե նույնիսկ մեկ դեպք հարցեր է հարուցում, դա չի նշանակում, թե հիմա կարող եմ պնդել, որ դա Ընտրական օրենսգրքի կամ էթիկայի կանոնների խախտում է, մինչեւ յուրաքանչյուր մանրուքը չուսումնասիրեմ»,- նշեց Դ. Հարությունյանը:
Մանրամասները՝ տեսանյութում:
