«Օհանյան-Րաֆֆի-Օսկանյան» դաշինքը առաջիկա խորհրդարանական ընտրություններին մասնակցող ընդդիմադիր քաղաքական ուժերի հետ ազգային համաձայնության իշխանություն ձևավորելու առաջարկ է անում։ Տարածված հայտարարության մեջ նշվում է. «ՕՐՕ դաշինքը պատրաստակամություն է հայտնում Հայաստանի Հանրապետության Ազգային ժողով ընտրվելուց հետո այլ ընդդիմադիր քաղաքական ուժերի հետ միասնաբար ձևավորել Ազգային համաձայնության կոալիցիոն իշխանություն՝ բացառելով դրանում ՀՀԿ-ի ներգրավումը, որի կապակցությամբ միասնաբար քննարկել և ստորագրել համապատասխան հուշագիր»։
«Առաջին լրատվական»-ի հետ զրույցում «Բարգավաճ Հայաստան» խմբակցության ղեկավար Նաիրա Զոհրաբյանն ընդգծեց՝ իրենք հետընտրական կոալիցիա բացառում են մեկ քաղաքական ուժի՝ Հանրապետական կուսակցության հետ. «ՀՀԿ-ի հետ որևէ ֆորմատով՝ կլինի անունը կոալիցիա, ազգային համաձայնության կառավարություն, թե եղբայրության համադաշնության հուշագիր, մենք բացառում ենք հետընտրական համագործակցություն»։
Ինչ վերաբերում է ընդդիմադիր մյուս քաղաքական ուժերի հետ համագործակցելու հնարավորությանը, մեր զրուցակիցն արձագանքեց. «Մենք քանիցս նշել ենք՝ «Ծառուկյան» դաշինքը գնում է վերցնելու բացարձակ մեծամասնություն։ Մենք մեզ համար սահմանել ենք առավելագույն նշաձող, և այսօր հանրային վստահության այն ռեսուրսը, որ կա Ծառուկյանի հանդեպ, մեզ տալիս է վստահություն և հիմք՝ պնդելու, որ «Ծառուկյան» դաշինքը ստանալու է մեծամասնություն»։
Այդուհանդերձ, Նաիրա Զոհրաբյանն ընդգծեց՝ իրենք պատրաստ են այլ զարգացումների դեպքում քննարկել խորհրդարան անցած բոլոր քաղաքական ուժերի հետ (բացառությամբ ՀՀԿ-ի) համագործակցության ֆորմատներ։ Ինչ վերաբերում է այս պահին կոնկրետ փաստաթուղթ ստորագրելուն, ապա հարցը դաշինքում չի քննարկվել, և անկեղծ ասած՝ ես չեմ կարող հիմա խոսել դրա նպատակահարմարության մասին։ Կրկնում եմ՝ խորհրդարան անցած ցանկացած ուժի հետ՝ բացառությամբ ՀՀԿ-ի, պատրաստ ենք ցանկացած ֆորմատի, բայց քանի որ դաշինքում չենք քննարկել՝ այս պահին դրա նպատակահարմարության մասին խոսել չեմ կարող»։
«Ելք» դաշինքի համամասնական ցուցակը գլխավորող Ազգային ժողովի պատգամավոր Էդմոն Մարուքյանն էլ «Առաջին լրատվական»-ի հետ զրույցում ասաց, որ հարցը պետք է քննարկել ընտրություններից հետո. «Անկեղծ ասած՝ չեմ պատկերացնում, թե դա հիմա ինչպես է հնարավոր իրականացնել։ Ասեմ ավելին՝ մենք քաղաքական սերնդափոխության կողմնակից ենք։ Մենք չենք տեսնում, որ, օրինակ, Օսկանյանը կամ Օհանյանը կրկին նախարար լինեն։ Մենք նոր մարդկանց ենք բերում քաղաքականություն։ Մենք տասը տարի արտգործնախարար կամ պաշտպանության նախարար եղած անձանց կրկին իշխանության մեջ չենք տեսնում։ Կարող են խորհրդատուներ լինել, բայց սպասվող կառավարության մեջ կոնկրետ այդպիսի մարդկանց չեմ տեսնում»,- փոխանցեց Մարուքյանը։