«Առաջին լրատվական»-ի զրուցակիցն է ԱԺ ՀՀԿ խմբակցության ղեկավար Վահրամ Բաղդասարյանը:
– Պարոն Բաղդասարյան, ԱՄՆ դեսպան Ռիչարդ Միլսը նշել է, թե իրենց հաղորդումներ են հասնում, որ փորձեր են արվում քվեներ գնել, փորձում են մարդկանցից ճշտել, թե ում են տալու իրենց ձայնը: «Սրանք ընդունելի չեն, ազատ ու արդարացի ընտրությունների մաս հանդիսանալ չեն կարող: Բոլոր կուսակցություններին, ովքեր նման բան են անում, ուզում եմ կոչ անել, որ դադարեցնեն, դա օրինական չէ: Հայաստանի քաղաքացիներն ու ընտրողներն էլ պետք է այս երևույթների մասին փորձեն հաղորդումներ ներկայացնել ՄԻՊ-ին կամ ոստիկանությանը, որպեսզի այս երևույթները չպահպանվեն, որ ընտրությունները արդար անցնեն, թափանցիկ, իսկ դա բոլորի համար լավ կլինի»,- ասել է դեսպան Միլսը: Ինչպե՞ս եք գնահատում այս հայտարարությունը:
– Ես ողջունում եմ դեսպան Միլսի հայտարարությունը: Սա ասում եմ անկեղծ, քանի որ սահմանադրական բարեփոխումներից հետո սկսած գործընթացները պետք է տրամաբանական ավարտին հասցնենք: Այո, պետք է ողջամիտ լինեն բոլոր քաղաքական ուժերը, և գործընթացները, որ նախօրոք ցանկանում են ինչ-որ շահեկան վիճակ ստեղծել կուսակցությունները, արդյունք չեն տալու, լինելու են անարդյունավետ, որովհետև վերջում արդեն իսկ այդ մարդիկ մնալու են քվեախցում քվեաթերթիկի և իրենց խղճի դիմաց: Եվ, բնականաբար, կոպիտ ասած՝ դրանք արջի ծառայություններ են, շտաբի աշխատողներ կլինեն, ովքեր ուզում են մարդկանցից կորզել նրանց տրամադրությունները: Պրակտիկան ցույց է տվել, որ շուրջ 80-90 տոկոսը չի համընկնում իրականությանը, և այդ մարդիկ տարբեր մարդկանց, տարբեր քաղաքական ուժերի անուններ են տալիս: Եվ, բնականաբար, մենք ընդունում ենք դեսպան Միլսի հորդորը, և մենք ենք հորդորում մեր քաղաքացիներին, որ քվեարկությունը գաղտնի է, և պաշտպանեն քվեարկության գաղտնիությունը: Շտաբի աշխատողները եթե ուզում են գործ կատարել, կարող են պարզապես ճշտումներ կատարել՝ ովքեր են Հայաստանում, ովքեր են բացակայում, որպեսզի մենք տրամաբանական մոտեցումներն իմանանք և կարողանանք ճիշտ ձևավորել մեր քարոզարշավը: Եվ ես ողջունում եմ դեսպան Միլսի հայտարարությունը:
– Կարեն Կարապետյանի՝ ԱԺ-ում լրագրողների հետ զրույցը բավականին աղմուկ է բարձրացրել: Սա ցույց է տալիս, որ ՀՀԿ-ի ներսում իսկապե՞ս լուրջ խմորումներ են:
– Կարեն Կարապետյանն իմ ընկերն է, և ես նրա ասածներում որևէ խմորումների մասին արտահայտություն չէի կարող որսալ, քանի որ եթե լրագրողները կտրտեն նրա ասածները, ամբողջ միտքը դնեն մի կողմ և վերցնեն մի նախադասություն, այդտեղ կարելի է շատ եզրահանգումներ և մեկնաբանություններ անել: Ընդհանուր առմամբ նրա բոլոր մոտեցումները տրամաբանական են, և նա ևս հորդորում է, որ մարդկանց պետք չէ ստիպել, պետք չէ բռնանալ, և մարդիկ պետք է արտահայտեն քաղաքացու ազատ կամքը:
– Շատերը ասում են, որ նա անցել է գրոհի՝ պաշտպանելով նաև վարչապետ Կարեն Կարապետյանին:
– Ես նկատեցի, որ ինքը պաշտպանում է ոչ միայն Կարեն Կարապետյանին, այլև թիմին: Մեր պայքարը թիմային է, մեր նպատակը թիմային հաջողություններն են, և ինձ թվում է, որ Կարեն Կարապետյանը, ես և մնացած բոլորս այդ տրամաբանությամբ ենք մոտենում խնդրին, և մենք պետք է կարողանանք մեր թիմի շահերը պաշտպանել՝ իհարկե, օրենքը տառին համապատասխան:
– Իշխանության ներկայացուցիչ Կարեն Կարապետյանը նաև նշեց, որ այսօր հանրության մոտ կա մեծ դժգոհություն իշխանությունից: Համամի՞տ եք:
– Այո, բա իհարկե այսօր կա դժգոհություն իշխանությունից: Եվ եթե ամեն ինչ իդեալական լիներ, ընդդիմությունն այսօր որևէ քայլ չէր կատարի: Ուրեմն կան դժգոհություններ, և եթե դժգոհություն չլինի, ընդդիմությունը որտեղի՞ց ձայներ կհավաքի: Եվ պառլամենտում եթե պետք է լինեն մեկ իշխանական և 5-6 ընդդիմադիր քաղաքական ուժեր, ուրեմն կա դժգոհություն իշխանությունից: Մենք ունենք լուրջ բացթողումներ, և մենք պետք է առաջ շարժվենք՝ դաս քաղելով սխալներից, և կարողանանք ստեղծել այն երկիրը, այն ապագան, որը պատկերացնում է մեր հանրությունը մեզ հետ միասին: Կան այդ դժգոհությունները, և ինքը խոսեց դրա մասին:
– Կարեն Կարապետյանը նաև խոսեց ռեյտինգային ընտրակարգին դեմ լինելուց: Ի դեպ, ԲՀԿ-ական պատգամավորները նույնպես նշում են, որ ռեյտինգային ընտրակարգն է ծեծկռտուքի առիթ տալիս: Համամի՞տ եք:
– Առաջին անգամ է նմանատիպ ընտրապայքար կազմակերպվում: Ուշադրություն դարձրեք, որ 90 թվականի Գերագույն խորհրդի ընտրություններից առ այսօր մենք աստիճաբար անցում ենք կատարում դեպի համամասնական ընտրություններ՝ մեծամասնականի քանակը կրճատելով: Սա բավականին լուրջ և ռիսկային քայլ է՝ ամբողջովին վերացնել մեծամասնական համակարգը: Եվ ինձ թվում է՝ սա նախորդ քայլն է, որ հաջորդ անգամ մենք արդեն լիարժեք գնանք միայն կուսակցական ընտրությունների: Այստեղ կա ռիսկային գործոն, և, բնականաբար, ցանկացած թիմի ընտրվողների ձեռք չի տալիս, որ իր թիմակիցը ընտրապայքար ծավալի: Բայց կան տարբեր մոտեցումներ, և յուրաքանչյուր քաղաքական գործիչ՝ բացի թիմի անդամ լինելուց, իրավունք ունի իր անձնական կարծիքը ունենալու: Մեզ մոտ դիկտատուրա չէ, որ եթե քաղաքական ուժը որոշում է մի բան, ուրեմն բոլորը միասնական պետք է այդ կարծիքն ունենան: Մենք դա անում ենք քննարկումների արդյունքում, բոլորն ունենում են իրենց անձնական կարծիքը, բայց երբ որոշում է կայացվում, ընդունելի ենք դարձնում այդ թիմային որոշումը: Եվ նա արտահայտել է անձնական կարծիքը և ոչ թե թիմի կարծիքը:
– ՀՀԿ-ն ընդհանրապես ինչպե՞ս է գնահատում Իշխան Զաքարյանի կատարած աշխատանքը՝ հաշվի առնելով հայտնի սկանդալը շուրջ 700 միլիարդ դրամի կոռուպցիոն ռիսկի մասին, որի պատճառով լարվեցին Իշխան Զաքարյանի և Սերժ Սարգսյանի հարաբերությունները։
– Եթե դուք ակնկալում եք, որ ես պետք է նախորդի մասին քննադատական խոսքեր հնչեցնեմ, այդպիսի բան չի կարող լինել: Կաշխատի նոր ընտրվածը, և մեկ տարի հետո համեմատության դաշտում մենք կանդրադառնանք երկուսին էլ: Մեկին ճանապարհել ենք, մյուսը դեռ չի սկսել աշխատանքը: Իսկ հայկական բնավորությունը՝ գնացածի հետևից սկսել բամբասել, ես դա չեմ ընդունում: Ես իմ բոլոր խոսքերն ասել եմ այն ժամանակ, երբ նա եղել է ՎՊ նախագահ: Լինելով ֆրակցիայի ղեկավար՝ ես ԱԺ ամբիոնից արտահայտել եմ իմ կարծիքը և մնում եմ իմ կարծիքին, և մեկ տարի հետո ես համեմատականներ կտանեմ Յոլյանի և Զաքարյանի աշխատանքների միջև:
