ՀՀ վարչապետ Կարեն Կարապետյանը վստահեցնում է՝ Հայաստան որևէ ապրանքի ներկրման սահմանափակում չկա: Ազգային ժողովում կառավարության հետ հարցուպատասխանի ժամանակ, պատասխանելով ընդդիմադիր պատգամավոր Նիկոլ Փաշինյանի հարցին, ՀՀ վարչապետը պնդեց իր հայտարարությունը, որ ցանկացած քաղաքացի Հայաստան կարող է ներմուծել ցանկացած ապրանք: «Մենք իրականում ունենք խաղի կանոնների խնդիր, սակայն սահմանի վրա որևէ ապրանքի ներկրման սահման ափակում չունենք»,- ասաց վարչապետը:
Անդրադառնալով պատգամավորի դիտարկմանը, թե տնտեսվարողներից մեկին թույլ չեն 460 տոննա կերոսին ներկրել Հայաստան՝ վարչապետն ընդգծեց, որ դա ոչ թե կերոսին է, այլ վառարանային վառելիք: «Մենք կասկածում ենք, որ այսօր Հայաստանում այդպիսի վառելիքի սպառում ունենք: Մենք կասկածներ ունենք, որ այն հետագայում խառնվում է կերոսինի հետ ու շուկայում հայտնվում է անորակ նավթամթերք: Տնտեսական զարգացման եւ ներդրումների նախարարության տեսչական մարմինը երկար ժամանակ իր գործառույթները չէր կատարում, ավելին, մոտ օրերս մենք հանդիպել ենք մեկ այլ մատակարարողի հետ, որը նույնպես բարձրացրել է Իրանից ու ԵԱՏՄ-ից նավթամթերքի ներկման հետ կապված իր խնդիրը: Այնտեղ եւս ունենք համակարգային խնդիրներ, որոնց պետք է լուծում տանք»,- հավելեց վարչապետը:
Նա նշեց, որ ապրիլյան պատերազմի ժամանակ էլ եղան դեպքեր հենց այս պատճառով, երբ ռազմական տեխնիկան չէր աշխատում: «Գուցե մենք որոշակի փոփոխություններ իրականացնենք, որպեսզի ձեւակերպվեն խաղի կանոնները, որ այս ապրանքի ներկրման հետ կապված քաշքշուկ չլինի»,- եզրափակեց Կարեն Կարապետյանը: